Aşgabatda geçirilýän 2026-njy ýylyň Türkmenistanyň Futbol federasiýasynyň Kubogy ugrundaky ýaryşda Türkmenistanyň 20 ýaşa çenli ýaşlar ýygyndy topary iň oňat bäş toparyň hataryna goşuldy. Didar Hajyýewiň we Mekan Nasyrowyň şägirtleri bu üstünligi 5-nji orun ugrundaky duşuşykda paýtagtymyzyň «Köpetdag» toparyny ýeňmek bilen gazandylar.

Ýaşlar ýygyndysy üçin bu ýeňiş aňsat düşmedi. Ikinji ýarymyň ortalaryna çenli olar Arslan Saparowyň 27-nji minutda we Orazgeldi Seýidowyň 60-njy minutda geçiren gollaryndan soň 0:2 hasabynda utulýardylar. «Köpetdag» topary bu duşuşygy ýeňiş bilen tamamlar öýdülýärdi. Emma ýaş futbolçylar ruhdan düşmediler. Duşuşygyň 69-njy we 75-nji minutlarynda Weýisgeldi Orazdurdyýew iki gol geçirip, hasaby deňlemegi başardy – 2:2. Esasy wagt deňme-deň hasapda tamamlandy we ýeňijini kesgitlemek üçin jerime urgularyna geçildi. Onda Türkmenistanyň ýaşlar ýygyndysy 5:3 hasabynda ýeňiş gazanyp, 5-nji orna mynasyp boldy. «Köpetdag» topary bolsa ýaryşy 6-njy orunda tamamlady.

Günüň beýleki duşuşygynda Balkanabadyň «Nebitçi» topary «Merw» toparyny 3:1 hasabynda ýeňip, 7-nji orny eýeledi we Marynyň toparyny sekizinji orunda galdyrdy. Ýeňijilerden Baýramgeldi Nurlyýew 49-njy minutda, Hydyr Agöýliýew 70-nji minutda we Alibek Abdyrahmanow 86-njy minutda tapawutlandylar. 82-nji minutda Salim Umarowyň meýdançadan çykarylmagy sebäpli duşuşygy azlykda tamamlan «Merw» toparynyň ýeke-täk goluny 77-nji minutda Abdyresul Abdyýew geçirdi.

«Aşgabat» köpugurly stadionynyň merkezi meýdançasynda geçirilýän ýaryşda indi iki duşuşyk galdy. Ilki bilen 3-nji orun ugrundaky bäsleşikde «Ahal» topary bilen «Aşgabat» topary duşuşar. Soňra bolsa finalda «Arkadag» topary bilen «Şagadam» topary 2026-njy ýylyň Türkmenistanyň Futbol federasiýasynyň Kubogy ugrunda bäsleşerler.

Ýatladyp geçsek, geçen ýyl bu hormatly baýraga «Arkadag» toparynyň futbolçylary mynasyp bolupdy. Şonda ýaryş Gökdepe etrabynyň Babarap geňeşliginde ýokary liganyň alty toparynyň gatnaşmagynda bir tapgyrda geçirilipdi.

«AA»-nyň habarçysy

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Aýatolla Seýed Mojtaba Hoseýni Hameneýä Eýran Yslam Respublikasynyň Beýik lideri wezipesine saýlanylmagy mynasybetli ýürekden gutlaglaryny we iň gowy arzuwlaryny iberdi.

Gahryman Arkadagymyz mümkinçilikden peýdalanyp, Eýran Yslam Respublikasynyň Beýik liderine berk jan saglyk, Eýranyň halkynyň parahatçylygyna, gülläp ösüşine gönükdirilen ähli başlangyçlarynda uly üstünlikleri arzuw etdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Diýarymyzda Halkara zenanlar gününiň giňden bellenilýän gününde häzirki zamanyň ösen talaplaryna we ýokary halkara görkezijilere laýyk derejede bina edilen Arkadag şäherinde bolup, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ştab-kwartirasynda Halkara zenanlar güni mynasybetli ýurdumyzyň mährem enelerini, gelin-gyzlaryny gutlady.

Gahryman Arkadagymyz ýurdumyzda bahar paslynyň ilkinji günlerinde mähriban enelerimiziň, gelin-gyzlarymyzyň baýramynyň — Halkara zenanlar gününiň giňden bellenip geçilýändigini aýdyp, Berkarar döwletiň täze eýýamynyň Galkynyşy döwründe belent ruhly, päk ahlakly, çeper elli türkmen zenanlarynyň sarpasynyň belent tutulýandygyny, dürli kärde zähmet çekýän gelin-gyzlaryň zähmetine uly hormat goýlup, olar üçin ähli şertleriň döredilýändigini belledi.

Milli Liderimiz mähriban ene-mamalarymyzy, bagtyýar gelin-gyzlarymyzy, eziz uýalarymyzy, gyzjagazlary ajaýyp bahar baýramy bilen tüýs ýürekden gutlady we ata-babalarymyzyň zenanlara sarpa goýmak, olaryň mertebesini belent tutmak ýaly milli däpleri kämilleşdirip, mukaddeslik derejesine ýetirendiklerini nygtady. Türkmen halky ene-mamalarymyza, mähriban zenanlarymyza maşgala ojagynyň, maşgala abadançylygynyň eýesi hökmünde garap gelipdir. “Mährem enä, wepaly ýanýoldaşa, mähriban uýa bolan aýratyn hormat asyrlardan aşyp, halkymyzyň asylly däpleri hökmünde biziň günlerimize gelip ýetipdir. Ynsana ýaşaýşy peşgeş beren ene hemişe tagzym edilmeli mukaddeslikdir. Ol Watan, ýurt, toprak bilen deň derejede goýulýandyr. «Ene toprak» diýlen düşünje hem ýöne ýerden dörän däldir. Şahyryň sözleri bilen aýtsak, biz enäni dünýäniň görki we durky hasaplaýarys. Eneleri begendirmek, razy etmek iň uly bagtdyr. Eneleriň ak patasy, alkyşy ýollaryňy açýan gudrat hasap edilýär” diýip, Gahryman Arkadagymyz sözüni dowam etdi.

«Garaşsyz, baky Bitarap Türkmenistan — bedew batly at-myradyň mekany» ýylynda Halkara zenanlar gününiň baýramçylyk dabaralarynyň giňden toýlanylýandygyny belläp, Milli Liderimiz bagtyýar zenanlaryň gazanylýan ähli üstünliklere, ata Watanymyzyň kuwwatyny mundan beýläk-de pugtalandyrmaga mynasyp goşantlaryny goşýandyklaryny, milli däp-dessurlarymyzy aýawly saklamakda olaryň aýratyn ornunyň bardygyny nygtady. “Döwletimiz köp çagaly maşgalalary hemmetaraplaýyn goldamak, olaryň ýaşaýyş-durmuş şertlerini gowulandyrmak barada aýratyn alada edýär. Her ýyl Halkara zenanlar güni mynasybetli «Ene mähri» diýen hormatly ada mynasyp bolan köp çagaly eneleri sarpalamak dabarasyny geçirýäris. Köp çagaly maşgalalaryň uly toparyna ýokary amatlyklary bolan täze öýleriň açarlary gowşurylýar” diýip, Halk Maslahatynyň Başlygy belledi. Türkmenistanyň Prezidentiniň adyndan ýurdumyzyň zenanlaryna pul sowgatlaryny gowşurmagyň asylly däbe öwrülendigini aýdyp, Gahryman Arkadagymyz gelin-gyzlarymyzyň Watanymyzyň owadan gül-gunçalarydygyny, öýlerimiziň bagt ýyldyzlarydygyny nygtady we zenanlaryň bagtyýar durmuşda ýaşamaklary, işlemekleri üçin mundan beýläk-de ähli zerur şertleriň dörediljekdigini tassyklady.

Milli Liderimiz ene-mamalarymyzy, gelin-gyzlarymyzy, gyzjagazlary, ähli zenanlary ýurdumyzda giňden bellenilýän Halkara zenanlar güni bilen ýene-de bir gezek tüýs ýürekden gutlap, olara berk jan saglyk, egsilmez bagt, maşgala ojaklarynyň abadan bolmagyny arzuw etdi.

...Soňra Arkadag şäherindäki Gurbanguly Berdimuhamedow adyndaky çagalar sagaldyş-dikeldiş merkezinde bejergi alýan gyzjagazlara Türkmenistanyň Prezidentiniň adyndan Halkara zenanlar güni mynasybetli pul sowgatlaryny gowşurmak dabarasy boldy. Olara Gahryman Arkadagymyzyň adyndan baýramçylyk sowgatlarynyň hem gowşurylmagy bu ýerde guralan dabaranyň ähmiýetini has-da belende göterdi.

Häzirki döwürde bagtyýar çagalygyň we nurana arzuwlaryň hasyl bolýan mekany hökmünde ykrar edilen Türkmenistanda sagdyn durmuş ýörelgeleriniň berkidilmegine döwlet derejesinde ähmiýet berilýär. Şunda ýaş nesilleriň saglygyny berkitmek, olaryň sazlaşykly ösüşini üpjün etmek hormatly Prezidentimiziň baştutanlygynda amala aşyrylýan durmuş ugurly döwlet syýasatynyň esasy ugurlarynyň birine öwrüldi. Bu hakykat çagalaryň we olaryň ata-eneleriniň Gahryman Arkadagymyza, Arkadagly Gahryman Serdarymyza aýdýan çuňňur alkyşlarynda-da öz beýanyny tapýar.

Hormatly Prezidentimiziň we Milli Liderimiziň adyndan gowşurylan baýramçylyk sowgatlary uly buýsanç duýgulary bilen kabul edildi. Merkezde bejergi alýan çagalar belent ruha beslenen aýdym-sazly çykyşlaryň üsti bilen tüýs ýürekden hoşallyklaryny beýan etdiler.

Eziz eneler!
Mähriban gelin-gyzlar!

Sizi tebigatyň janlanyp, ynsan ýüreklerinde ylham-joşgun döredýän bahar paslynyň ilkinji günlerinde giňden bellenilýän Halkara zenanlar güni bilen tüýs ýürekden gutlaýaryn. “Garaşsyz, baky Bitarap Türkmenistan — bedew batly at-myradyň mekany” ýylynda bu halkara baýramyň şanyna eziz Diýarymyzyň ähli obalarynda we şäherlerinde geçiriljek göwün göteriji dabaraly çäreleriň Berkarar döwletiň täze eýýamynyň Galkynyşy döwrüniň ägirt uly işlerine taýsyz goşantlaryny goşýan, milli ýörelgelerimizi, maşgala mukaddesliklerini mynasyp dowam etdirýän eziz enelerimiziň, mähriban uýalarymyzyň, gelin-gyzlarymyzyň kalbynda ýakymly duýgulary döretjekdigine berk ynanýaryn.

Berkarar döwletiň täze eýýamynyň Galkynyşy döwri bedew bady bilen ynamly öňe barýan demokratik, hukuk we dünýewi döwletimiziň deňsiz-taýsyz ösüşleri gazanýan eýýamydyr. Milli ykdysadyýetimiziň ähli ugurlarynda giňden ýaýbaňlandyrylan, asyrlara ýaň saljak beýik işler, ägirt uly özgertmeler berkarar döwletimiziň kuwwatyny has-da artdyrýar, şäherdir obalarymyzyň keşbini has-da gözelleşdirýär. «Watan diňe halky bilen Watandyr! Döwlet diňe halky bilen döwletdir!» diýen baş ýörelgämizden ugur alyp, döwletimiziň we jemgyýetimiziň iň ýokary gymmatlygy bolan her bir adamyň bagtyýar durmuşda ýaşamagy üçin uly tagallalary edýäris. Garaşsyz Watanymyzda mähriban enelerimiziň, gelin-gyzlarymyzyň bagtyýar durmuşymyza buýsanyp ýaşamaklary, döredijilikli zähmet çekmekleri, maşgala gurmaklary, perzent terbiýelemekleri üçin giň mümkinçilikleri döredýäris.

Biziň milli maksatnamalarda kesgitlän wezipelerimizi hem-de il-ýurt bähbitli özgertmelerimizi üstünlikli durmuşa geçirmäge gelin-gyzlarymyz işjeň gatnaşýarlar. Olar müňýyllyklardan gözbaş alyp gaýdýan we kämil sungat derejesine ýetirilen haly dokamagyň, keşde gaýamagyň, kürte, don, tahýa tikmegiň, jorap örmegiň özboluşly däplerini dowam etdirmekde mynasyp işleri alyp barýarlar.

Ýurdumyzyň zenanlary döwlet dolandyryş işlerinde, ylym, bilim, saglygy goraýyş, sport, medeniýet, nebitgaz, gurluşyk, senagat, ulag we aragatnaşyk, oba hojalyk, söwda ulgamlarynda, mahlasy, ähli ugurlarda uly işleri bitirýärler. Müňýyllyklardan gözbaş alýan milli maşgala mukaddesliklerimizi dowam etdirip, şahsyýetiň, maşgalanyň, jemgyýetiň we döwletiň arasyndaky baglanyşygy has-da berkitmekde, aýratyn-da, ýokary watançylyk duýguly, milli buýsançly ýaşlarymyzy — Watanymyzyň daýanjy bolan täze nesilleri terbiýelemekde dilleri senaly enelerimiziň hem-de zenanlarymyzyň ägirt uly hyzmatlary bardyr. Berkarar Watanymyzda gülden näzik gyzlarymyzyň, asylly gelinlerimiziň, mährem enelerimiziň sylag-sarpasy, abraý-mertebesi örän belentdir.

Däp bolşy ýaly, şu ýyl hem Bitarap ýurdumyzyň gülläp ösmeginde we özgertmeleri amala aşyrmakda, Watanymyza wepaly, sagdyn, ruhubelent nesilleri terbiýeläp ýetişdirmekde zenanlarymyzyň bitirýän uly hyzmatlary üçin Halkara zenanlar güni mynasybetli enelerimize, edara-kärhanalarda, guramalarda zähmet çekýän, hünär bilimini alýan gelin-gyzlarymyza, orta mekdeplerde okaýan, çagalar baglarynda terbiýelenýän gyzlara pul sowgatlary dabaraly gowşuryldy. Garaşsyz, hemişelik Bitarap Watanymyza wepaly, ýokary ahlakly, ruhubelent nesilleri terbiýeläp ýetişdirmäge goşan asylly goşantlaryny nazara alyp, köp çagaly enelerimize «Ene mähri» diýen hormatly ady dakdyk. Eziz Diýarymyzyň ähli şäherlerinde we obalarynda ösüşlere, üstünliklere, tebigatymyzyň gözelliklerine, enelerimiziň mähribanlygyna, gelin-gyzlarymyzyň ajaýyp häsiýetlerine bagyşlanan aýdym-sazly baýramçylyk dabaralary bolsa mukaddes Garaşsyzlygymyzyň şanly 35 ýyllyk toýy giňden bellenilýän “Garaşsyz, baky Bitarap Türkmenistan — bedew batly at-myradyň mekany” ýylynyň bahar paslyna özboluşly nuruny çaýýar, agzybirligimizi hem-de jebisligimizi bütin dünýä ýaýýar.

Hormatly eneler!
Mähriban gelin-gyzlar!

Berkarar döwletiň täze eýýamynyň Galkynyşy döwründe jemgyýetimiziň sagdynlygyny üpjün etmek, bilimli, edep-ekramly, kesp-kärli, sagdyn nesli terbiýelemek biziň alyp barýan syýasatymyzyň ileri tutulýan ugurlarynyň biri bolup durýar. Maşgala terbiýesi halkymyzyň müňýyllyklardan gözbaş alýan edep mekdebidir. Geçmişde türkmen halkynyň mukaddes maşgala ojaklarynda merdana şahsyýetler, beýik akyldarlar, Watan mukaddesligine ygrarly nesiller kemala gelipdir. Ýaşlary watansöýüjiligiň we ynsanperwerligiň belent ruhunda terbiýelemegiň nusgalyk mekdebi döredilipdir. Bu mekdebiň esasynda kemala gelen ýiti zehinli, ylymly-bilimli, watansöýüji ýaşlarymyz bilen bilelikde beýik geljegimizi gurýarys.

Mähriban eneler!
Hormatly gelin-gyzlar!

Sizi dünýäniň gözelligini hem-de sazlaşygyny özünde jemleýän ajaýyp bahar baýramy bolan Halkara zenanlar güni bilen ýene-de bir gezek tüýs ýürekden gutlaýaryn. Size berk jan saglyk, uzak ömür, bagtyýar we abadan durmuş, ata Watanymyz eziz Türkmenistanyň gülläp ösmegi ugrunda alyp barýan işleriňizde üstünlikleri hem-de rowaçlyklary arzuw edýärin. Goý, mukaddes maşgala ojaklarymyzyň daýanjy, mertebesi hem-de guwanjy bolan mähriban enelerimiziň, gelin-gyzlarymyzyň güler ýüzleri elmydama bahar ýaly nurana bolsun!

Türkmenistanyň Prezidenti
Serdar Berdimuhamedow.

“Panbarhat” dükanlarynda söwda hemişe-de gyzgalaňly, ýöne Halkara zenanlar gününiň öňüsyrasynda bu ýerde üýtgeşik bir ýagdaý höküm sürýär. Gowudan-gowy sowgat gözleýän erkek adamlar we zenanlar bu ýere nepis dokalan panbarhat satyn almak üçin gelýärler. Näziklik sözüniň manydaşy hökmünde ykrar edilen bu mata ýörite dükana baryp-gelmegi Gündogaryň gözellik dünýäsiniň jümmüşine syýahata öwürýär.

Müşderileri adaty satyjylar däl-de, hakyky hünärmenleriň garşy almagy bu dükanlaryň esasy gymmatlygydyr. Bu ýerde işleýän zenanlar matanyň her çitiminiň taryhyna belet. Olar gadymy nagşyň nusgawy "Gadym goçak gülünden" başlap, ajaýyp "Pişme gülüne" çenli manysyny tirip, gaşlary öwşün atýan "Gaşly" matalary görkezip we şu möwsümde haýsy nagyşlaryň has ýörgünlidigini aýdyp bilýärler.

Dükanyň işgärleriniň aýtmagyna görä, reňkleriň dürlüligine garamazdan, biziň ýurdumyzda gyrmyzy we goýy gyzyl söýgüli reňkler bolmagynda galýar.

Bu ýokary hilli mata, taryhyny 2008-nji ýyldan alyp gaýdýan Aşgabadyň panbarhat fabriginde öndürilýär. Bu kompaniýa dürli görnüşli matalary we taýýar önümleri, şol sanda ajaýyp başatgyçlary, gyňaçdyr şarf öndürýär. Inçe süýümli ýüpegi gaýtadan işlemekden başlap, matanyň ýüzüne nagyş basmaga çenli tutuş önümçilik işi iň täze enjamlarda amala aşyrylýar. Iň näzik şifon esasly ýeňiljek nagyş we her metrinde 100% ýüpegiň ajaýyp hiliniň bolmagy bu fabrigiň önümlerine özboluşly häsiýet berýär.

Ýurdumyzda «Garaşsyz, baky Bitarap Türkmenistan — bedew batly at-myradyň mekany» şygary astynda geçýän 2026-njy ýyl üçin ýörite "Atly panbarhat" atly mahsus mata çykaryldy. Onuň bezeginde ýylyň nyşany – rowaýata öwrülen ahalteke bedewi öz beýanyny tapypdyr.

Türkmenistanyň Dokma senagaty ministrligi onlaýn satuwy işjeň ösdürýär, bu bolsa matalary saýlamak işini aňsatlaşdyrýar we döwre bap getirýär.

Müşderilere amatly bolmagy üçin, salgysynda ýerleşen saýt ekologiýa taýdan arassa we ýokary hilli önümleriň giň görnüşini hödürleýär. Halaýan parçaňyzy ýa-da gerek şaýlaryňyzy milli nyşanly ajaýyp sowgat gutularynda we mahsus torbajyklarda satyn alyp bilersiňiz. Şunuň ýaly “alada” alamaty islendik zenan üçin ajaýyp sowgat bolar, sebäbi türkmen panbarhaty ýerli we halkara bazarlarda giňden ykrar edilen nepis matadyr.

Swetlana Çirsowa

Şu gün Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onda ýurdumyzyň harby we hukuk goraýjy edaralarynda şu ýylyň iki aýynda alnyp barlan işleriň netijelerine seredildi. Şeýle-de Garaşsyz döwletimizde howpsuzlygy, asudalygy üpjün etmäge, harby we hukuk goraýjy edaralaryň maddy-enjamlaýyn binýadyny berkitmäge, işini has-da kämilleşdirmäge degişli meseleleriň birnäçesi ara alnyp maslahatlaşyldy.

Ilki bilen, Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçlerini ösdürmegiň maksatnamasynda göz öňünde tutulan wezipeleri üstünlikli ýerine ýetirmek boýunça ýylyň başyndan bäri alnyp barlan işler barada hasabat berdi. Şeýle hem Watan goragçylarynyň gulluk, ýaşaýyş-durmuş şertlerini gowulandyrmak, serkerdeleriň hünär derejesini ýokarlandyrmak babatda amala aşyrylan işler barada aýdyldy.

Hormatly Prezidentimiz hasabaty diňläp, ýurdumyzyň Ýaragly Güýçlerini kämilleşdirmek boýunça maksatnamalaýyn işleri mundan beýläk-de dowam etdirmegiň, Milli goşunymyzy ösdürmäge gönükdirilen toplumlaýyn çäreleri amala aşyrmakda dünýäniň öňdebaryjy tejribelerini yzygiderli öwrenmegiň möhümdigini belledi hem-de Döwlet howpsuzlyk geňeşiniň sekretary, goranmak ministrine birnäçe anyk tabşyryklary berdi.

Baş prokuror B.Muhamedow milli kanunçylygyň berjaý edilişine gözegçilik etmek, bu ugurda sanly ulgamy işjeň ulanmak we prokuratura edaralarynyň işgärleriniň hünär derejesini ýokarlandyrmak maksady bilen, ýylyň başyndan bäri alnyp barlan işler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, kanunlaryň we hukuk namalarynyň takyk ýerine ýetirilişine prokuror gözegçiligini dowam edip, mundan beýläk-de kanunylygy pugtalandyrmagyň, raýatlaryň hukuklaryny üpjün etmek babatda netijeli işleri alyp barmagyň wajyp wezipe bolup durýandygyny aýtdy hem-de bu babatda Baş prokurora birnäçe görkezmeleri berdi.

Içeri işler ministri M.Hydyrow geçen iki aýda ýurdumyzda hukuk tertibini pugtalandyrmak, düzgün bozulmalaryň, ýol-ulag hadysalarynyň öňüni almak, ýangyn howpsuzlygynyň kadalaryny berjaý etmek boýunça görlen çäreler barada hasabat berdi.

Döwlet Baştutanymyz hasabaty diňläp, jemgyýetçilik tertibini üpjün etmek, hukuk bozulmalarynyň öňüni almak boýunça alnyp barylýan işleri netijeli dowam etdirmek babatda ministre birnäçe anyk tabşyryklary berdi.

Ýokary kazyýetiň başlygy B.Hojamgulyýew bu düzümi ösdürmegiň maksatnamasyny durmuşa geçirmegiň çäklerinde şu ýylyň iki aýynda ýerine ýetirilen işleriň netijeleri, kazyýet edaralaryna sanly ulgamyň ornaşdyrylyşy, kazyýet ulgamyny kämilleşdirmegiň barşy, döwlet Baştutanymyzyň ozal beren tabşyryklarynyň ýerine ýetirilişi barada hasabat berdi.

Hormatly Prezidentimiz hasabaty diňläp, ýurdumyzda kanunylygy üpjün etmek, döwlet we jemgyýetçilik bähbitlerini, raýatlaryň hukuklaryny goramak boýunça alnyp barylýan işleri netijeli dowam etdirmegiň, kazyýet edaralarynyň işiniň hilini has-da ýokarlandyrmagyň möhümdigine ünsi çekdi hem-de bu babatda anyk görkezmeleri berdi.

Soňra milli howpsuzlyk ministri D.Meredow şu ýylyň ýanwar-fewral aýlarynda ýerine ýetirilen işler, Watanymyzda parahatçylygy we asudalygy üpjün etmek boýunça görlen çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, döwletimiziň konstitusion gurluşyny, milli bähbitlerini goramak boýunça alnyp barylýan işleri netijeli dowam etdirmek, milli howpsuzlyk edaralarynyň işini yzygiderli kämilleşdirmek babatda birnäçe anyk tabşyryklary berdi.

Döwlet serhet gullugynyň başlygy I.Ilamanow geçen iki aýda Watanymyzyň mukaddes serhetleriniň ygtybarly goralmagyny üpjün etmek, serhet goşunlarynyň maddy-enjamlaýyn binýadyny pugtalandyrmak boýunça görlen çäreler, bu ugurda ýurdumyzyň Ýaragly Güýçleriniň Belent Serkerdebaşysynyň ozal beren tabşyryklarynyň ýerine ýetirilişi barada hasabat berdi.

Hormatly Prezidentimiz hasabaty diňläp, ýurdumyzyň döwlet serhediniň dost-doganlyk serhedi bolup durýandygyny belledi hem-de onuň goraglylygyny üpjün etmek, serhet goşunlarynyň işini kämilleşdirmek, onuň maddy-enjamlaýyn binýadyny berkitmek boýunça alnyp barylýan işleri netijeli dowam etdirmegi tabşyrdy.

Adalat ministri M.Taganow halkara tejribäni ornaşdyrmagyň hasabyna milli kanunçylyk işini kämilleşdirmek, işgärleriň hünär derejesini ýokarlandyrmak, bu düzüme sanly ulgamy ornaşdyrmak boýunça ýylyň başyndan bäri amala aşyrylan işler barada hasabat berdi.

Döwlet Baştutanymyz hasabaty diňläp, ýurdumyzda kanunçylyk ulgamyny kämilleşdirmek işlerini has netijeli dowam etdirmegiň, raýatlara kanunçylygy düşündirmek bilen bagly wagyz-nesihat işlerini geçirmegiň zerurdygyny aýtdy we bu babatda birnäçe anyk tabşyryklary berdi.

Döwlet gümrük gullugynyň başlygy M.Hudaýkulyýew ýolbaşçylyk edýän düzümlerinde şu ýylyň ýanwar-fewral aýlarynda alnyp barlan işleriň netijeleri, şol sanda sanly ulgamy, döwrebap tehnologiýalary ornaşdyrmagyň hasabyna işiň netijeliligini ýokarlandyrmak, gullugy ösdürmegiň maksatnamasyny durmuşa geçirmek boýunça görlen çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, Türkmenistanyň gümrük nokatlarynda gümrük düzgünleriniň berjaý edilişine gözegçilik etmek boýunça alnyp barylýan işleri netijeli dowam etdirmegi tabşyrdy.

Döwlet migrasiýa gullugynyň başlygy A.Sazakow migrasiýa hyzmatlarynyň hilini ýokarlandyrmak, gullugyň maddy-enjamlaýyn binýadyny pugtalandyrmak, düzümi ösdürmegiň maksatnamasynda kesgitlenen wezipeleri üstünlikli ýerine ýetirmek maksady bilen, şu ýylyň iki aýynda amala aşyrylan işler barada hasabat berdi.

Hormatly Prezidentimiz hasabaty diňläp, migrasiýa edaralarynyň işini kämilleşdirmegi üns merkezinde saklamagyň, ýokary hilli migrasiýa hyzmatlaryny üpjün etmek boýunça işleri netijeli dowam etdirmegiň möhümdigini belledi hem-de bu babatda gullugyň ýolbaşçysyna anyk görkezmeleri berdi.

Hormatly Prezidentimiz mejlise gatnaşyjylara ýüzlenip, goranyş häsiýetli Harby doktrinamyzyň talaplaryna laýyklykda, Garaşsyz, hemişelik Bitarap döwletimiziň howpsuzlygyny we çäk bitewüligini ýokary derejede üpjün etmek, ýurdumyzyň goranmak ukybyny berkitmek, Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça yzygiderli çäreleriň durmuşa geçirilýändigini aýtdy hem-de bu işleriň mundan beýläk-de dowam etdiriljekdigini belledi.

Döwlet howpsuzlyk geňeşiniň mejlisinde başga-da birnäçe möhüm meselelere garaldy we olar boýunça degişli çözgütler kabul edildi.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisi jemläp, oňa gatnaşanlara berk jan saglyk, halkymyzyň asuda hem-de bagtyýar durmuşda ýaşamagy ugrunda alyp barýan jogapkärli işlerinde uly üstünlikleri arzuw etdi.

Türkmenistandaky Fransuz instituty (TFI) şu ýyl «Hereketde» diýen şygar astynda geçýän «Frankofoniýa – 2026» bäsleşiklerine gatnaşmak üçin ýüztutmalary kabul edýär.

Çäreleriň meýilnamasynda aýdym-saz bäsleşigi, düzme ýazmak bäsleşigi hem-de dürs ýazuwyň dilden bäsleşigi bar. Bäsleşiklere Türkmenistanyň raýatlary bolan we fransuz dilini öwrenýän ýa-da ozal öwrenen 17 ýaşdan uly adamlar gatnaşyp bilýärler.

Aýdym-saz bäsleşigi oňa gatnaşyjylara fransuz dilinde aýdymyň ýerine ýetirilişiniň wideoýazgysyny taýýarlamagy teklip edýär. Kompozisiýany saýlamak erkindir, ýöne, ol bäsleşigiň umumy temasyna kybap gelmelidir. Wideoýazgyny TFI-ne 13-nji martdan gijä galman sagat 18:30-a çenli kompakt-diskde ýa-da USB-toplaýjyda berilmelidir. Eminler finalçylaryň ukyp-başarnygyna sözleýişiň hili we artikulýasiýasy, ses aýratynlyklary, wideoişleriň özboluşlylygy we tema laýyk gelşi boýunça baha bererler. Iň oňat ýerine ýetirijiler bäsleşigiň finalynda sahnada çykyş etmäge mümkinçilik alarlar.

Düzme ýazmak bäsleşigi 14-nji martda TFI-niň binasynda sagat 16:00-da geçiriler. Gatnaşmak üçin 12-nji marta çenli (18:30-a çenli) institutyň mediatekasynda ýa-da ift.culture@gmail.com elektron salgy boýunça bellige alynmak gerek. Ýazuw işiň temasy bäsleşigiň geçirilýän gününde yglan ediler. Işlere üç esasy ugurlar: fransuz diliniň sowatlylygy we usuly, tabşyryga laýyklygy we özboluşlylygy boýunça baha berler. Ýeňijiler sylaglanylyş dabarasynyň dowamynda sahnada öz işleri bilen çykyş ederler.

Dürs ýazuwyň dilden bäsleşigi birinji ýa-da ikinji daşary ýurt dili hökmünde fransuz dilini öwrenýän ýokary okuw mekdepleriň talyplaryna niýetlenen aýratyn ugurdyr. Bäsleşigiň birinji tapgyry 11 –12-nji martda Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň hem-de Türkmenistanyň DIM-niň Halkara gatnaşyklary institutynyň binýadynda geçiriler.

Saýlama tapgyrda birinji we ikinji orunlary eýelän gatnaşyjylaryň iň oňat sekizisi finala çagyrylar. Jemleýji tapgyr oňa gatnaşyjylaryň bire-bir bolup, ikiçäk görnüşde gatnaşmagynda bäsleşikden göni çykmak arkaly geçiriler.

Bäsleşigiň finaly hem-de sylaglaýyş dabarasy 4-nji aprele meýilleşdirildi. Jemleýji çäreler Türkmenistanyň DIM-niň Halkara gatnaşyklary institutynda geçiriler.

Guramaçylar bäsleşikleriň oňa gatnaşyjylaryň özlerini görkezmekleri, tejribe alyşmaklary we döredijilik taýdan ösmekleri üçin meýdança öwrüljekdigine ynam bildirýärler.

Halkara Frankofoniýa gününiň çäklerinde her ýyl geçirilýän bäsleşikler Türkmenistanyň ýaşlarynyň arasynda fransuz diline bolan gyzyklanmany artdyrmaga, fransuz dilini wagyz etmäge hem-de ýaş zehinleri goldamaga, şeýle hem türkmen-fransuz medeni we bilim gatnaşyklaryny ösdürmäge hem-de pugtalandyrmaga gönükdirilendir. 

Anastasiýa Kasýanowa

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň halkynyň adyndan Eýran Yslam Respublikasynyň Prezidenti Masud Pezeşkiana we Eýranyň halkyna Eýran Yslam Respublikasynyň Beýik lideri Aýatolla Seýed Ali Hameneýiniň biwagt aradan çykmagy zerarly gynanç hatyny iberdi.

Gahryman Arkadagymyz şu agyr pursatda merhumyň dogan-garyndaşlaryna, ýakynlaryna medet beriji sözlerini beýan etdi hem-de jaýynyň jennet, ýatan ýeriniň ýagty bolmagyny dileg etdi.

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow milli binagärlik ýörelgeleri bilen häzirki zamanyň ösen tejribesiniň utgaşdyrylmagynda bina edilen Arkadag şäherine iş saparyny amala aşyrdy we şäheriň gurluşygynyň ikinji tapgyrynda alnyp barylýan işler, gurulýan hem-de döwrebaplaşdyrylýan desgalaryň şekil taslamalary bilen tanyşdy. Gahryman Arkadagymyz bu ýerde degişli ýolbaşçylaryň gatnaşmagynda iş maslahatyny geçirdi. “Garaşsyz, baky Bitarap Türkmenistan — bedew batly at-myradyň mekany” ýylynda Gahryman Arkadagymyzyň başlangyjy esasynda binýat bolan täze şäheriň gurluşygynyň ikinji tapgyrynda işler batly depginde dowam etdirilýär. Bu tapgyrda önümçilik, medeni-durmuş maksatly desgalaryň gurluşyklary häzirki döwrüň talabyna laýyk derejede alnyp barylýar.

Türkmen halkynyň Milli Lideri häzirki döwrüň nusgalyk şäheri derejesine eýe bolan Arkadag şäherine geldi. Bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow we Arkadag şäheriniň häkimi G.Mämmedowa ikinji tapgyrda alnyp barylýan işler, Gahryman Arkadagymyzyň ozal beren maslahatlaryndan ugur alyp, ýaşaýyş jaýlary üçin niýetlenen mebeller, olaryň bezeg aýratynlyklary barada maglumat berdiler. Şeýle hem bu ýerde Arkadag şäheriniň metjidiniň bezeg işlerine degişli serişdeler görkezildi.

Hajy Arkadagymyz metjidiň bezeg işlerine degişli serişdeleriň görnüşleri bilen tanyşdy. Milli Liderimiz metjidiň ähmiýetini nazara almak bilen, onuň bezeg serişdeleriniň talabalaýyk seçilip alynmagynyň wajypdygyna ünsi çekip, binanyň daşky we içki bezeg işleriniň, yşyklandyryş ulgamynyň degişli talaplara laýyk gelmelidigini belledi.

Türkmenistanyň at gazanan arhitektory Gurbanguly Berdimuhamedow şäheriň çäklerinde gurulýan ýaşaýyş jaýlarynda ýerleşdiriljek mebelleriň, aşhana otaglarynyň enjamlarynyň hiline, berkligine we uzak möhletleýinligine zerur üns bermek babatda maslahatlaryny berdi. Mebelleriň, otag enjamlarynyň maşgala agzalarynyň hemmesi üçin niýetlenendigini nazara alyp, olaryň amatlylygyna, berkligine aýratyn ähmiýet berilmelidir. “Akylly” şäher konsepsiýasy esasynda bina edilen Arkadag şäheriniň özboluşly binagärlik aýratynlyklary, ýokary ekologik derejesi, ýaşaýyş jaýlarynyň suw arassalaýjy serişdeler bilen üpjünçiligi, yşyklandyryş ulgamy halkymyzyň durmuşyna mahsus derejede bolmalydyr. Bu bolsa şäher ilatynyň durmuş derejesiniň ýokarlandyrylmagy bilen baglanyşykly meseleleriň oňyn çözgüdiniň baş şertini emele getirýär.

Gahryman Arkadagymyz ýol ýakalarynda oturdyljak germewleriň kada laýyk bolmalydygyna ünsi çekip, olaryň sürüjiler üçin howpsuzlyk talaplaryna görä oturdylmalydygyny nygtady. Şeýle hem Milli Liderimiz şäheriň çäklerinde we ýol ýakalarynda oturdyljak bag nahallaryny synlady, nahallaryň ýurdumyzyň toprak-howa şertlerine laýyk gelmelidigini, şäheriň ähli künjekleriniň gür baglyga, ýaşyl bagy-bossanlyga öwrülmelidigini aýdyp, bu babatda öz maslahatlaryny berdi. Munuň özi şäheriň ýol ýakalarynda, meýdançalarynda, binalaryň aralarynda ekilýän baglaryň hemişe gök öwsüp durmagyna, bu künjegiň ekologik ýagdaýyna oňyn täsir eder.

Soňra Türkmenistanyň Halk Maslahatynyň Başlygyna Ahalteke atlary şaýolunyň ugrunda ýerleşdiriljek serişdeleriň, şäheriň edara binalarynyň enjamlarynyň görnüşleri, bezeg serişdeleri, “Polatly” binasyny döwrebaplaşdyrmak boýunça alnyp barylýan işlere degişli şekil taslamalary görkezildi.

Hormatly Arkadagymyz şekil taslamalary bilen içgin tanşyp, olara birnäçe belliklerini aýtdy we degişli düzedişlerini girizdi. Şunda durmuş, önümçilik maksatly binalaryň enjamlaşdyrylyşyna, olaryň ýanaşyk ýerleriniň abadanlaşdyrylmagyna hemmetaraplaýyn esasda çemeleşilmelidir. Şeýle-de ýaşaýyş jaýlarynyň, binalaryň bezegleriniň, ýol ýakalaryndaky germewleriň, yşyklandyryş ulgamyna degişli sütünleriň we beýleki binalaryň hersiniň özüne mahsus bezeg serişdeleri bilen üpjün edilmelidigine üns çekildi. Saýlanyp alnan bezeg serişdeleri ýagyş-ýagmyra, Gün şöhlesiniň täsirine çydamly bolmalydyr. Olaryň uzak möhletleýin kadalara laýyk gelmegi möhüm talapdyr.

Türkmen halkynyň Milli Lideri edara binalarynyň mejlisler jaýlarynyň, iş otaglarynyň enjamlaşdyrylyşynyň ýokary halkara görkezijilere doly laýyk gelmelidigini, bu ugurda degişli düzümleriň sazlaşykly işiniň ýola goýulmalydygyny belledi we iş orunlarynyň amatlylyk derejesiniň üpjün edilmelidigini aýdyp, bu babatda degerli maslahatlaryny berdi.

Soňra Türkmenistanyň Halk Maslahatynyň Başlygy Gurbanguly Berdimuhamedow bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.

D.Orazow häzirki döwürde şäheriň gurluşygynyň ikinji tapgyrynda alnyp barylýan işler barada maglumat berdi. Bellenilişi ýaly, bu ýerde Arkadagly Gahryman Serdarymyzyň saýasynda “Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda” kesgitlenen wezipeleri üstünlikli ýerine ýetirmek ugrunda ähli zerur tagallalar edilýär. Lukmançylyk klasteriniň binalarynyň, täze seýilgähiň gurluşygy batly depginde dowam edýär.

Gahryman Arkadagymyz şäheriň lukmançylyk klasterine degişli binalaryň, şol sanda beýleki desgalaryň gurluşyklarynyň ýokary hil derejesiniň üpjün edilmeginiň, olaryň öz wagtynda ulanmaga tabşyrylmagynyň möhüm talap hökmünde kesgitlenendigine ünsi çekdi. Arkadag şäheriniň çäklerinde guruljak täze binalaryň we desgalaryň taslamalary taýýarlanylanda häzirki zaman şähergurluşyk maksatnamasynyň talaplarynyň göz öňünde tutulmalydygyny aýdyp, Milli Liderimiz bu ýerde ýokary ekologik ýagdaýyň üpjün edilmegi babatda maslahatlaryny berdi.

G.Mämmedowa häzirki döwürde şäheriň çäklerinde alnyp barylýan arassaçylyk we abadanlaşdyryş işleri, öňde boljak şanly seneleri mynasyp dabaralandyrmak ugrunda görülýän taýýarlyk işleri, Halkara zenanlar güni mynasybetli köp çagaly eneleri hormatlamak we baýramçylygyň hormatyna maşgalalary täze ýaşaýyş jaýlaryna göçürip getirmek ugrunda ýaýbaňlandyrylan çäreler barada maglumat berdi. Ol şu ýyl Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmegine 5 ýyl dolýandygyny nazara alyp, Arkadag şäheriniň häkimliginiň haýyşy boýunça bu senäni ýokary derejede dabaralandyrmak bilen baglanyşykly birnäçe teklipler bilen Gahryman Arkadagymyza ýüzlendi.

Milli Liderimiz Halkara zenanlar güni mynasybetli meýilleşdirilen çäreleriň, ilaty täze ýaşaýyş jaýlaryna göçürip getirmek dabarasynyň ýokary guramaçylyk derejesiniň üpjün edilmelidigini nygtady. Gahryman Arkadagymyz Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 5 ýyllygy mynasybetli meýilleşdirilen dabarany geçirmegi makullap, onuň anyk meýilnamasynyň taýýarlanylmalydygyny belledi we bu işe ýurdumyzyň medeniýet hem-de sungat ussatlarynyň işjeň çekilmeginiň maksadalaýyk boljakdygyna ünsi çekdi. Dabaralaryň guraljak ýerini kesgitlemek, onuň medeni maksatnamasyny taýýarlamak meselelerine toplumlaýyn esasda çemeleşilmelidir.

Türkmenistanyň Halk Maslahatynyň Başlygy alyp barýan işlerinde we kesgitlenen wezipeleri abraý bilen ýerine ýetirmekde degişli ýolbaşçylara üstünlikleri arzuw edip, bu ýerden ugrady.

Soňra ahalteke atlaryna aýratyn gadyr goýýan Gahryman Arkadagymyz Ahalteke atçylyk toplumynda behişdi bedewler bilen didarlaşdy we Hanbeg atly bedewe atlanyp, birsellem gezim etdi. Munuň özi ynsanyň hem bedewiň birek-birek bilen baglanyşygynyň çuňňurdygynyň aýdyň nyşanyna öwrüldi.

Häzirki döwürde ýurdumyzda Gahryman Arkadagymyzyň başyny başlan giň möçberli özgertmeleriniň Arkadagly Gahryman Serdarymyzyň baştutanlygynda üstünlikli durmuşa geçirilmegi esasynda ahalteke bedewleriniň halkara giňişlikdäki abraýy barha belende göterilýär. Türkmen bedewleriniň taryhyna, ahalteke atlarynyň özboluşly aýratynlyklaryna bagyşlanan birnäçe eserleri döreden Milli Liderimiziň tagallasy bilen ýurdumyzyň dürli künjeklerinde döwrebap atçylyk sport toplumlary guruldy. Atçylyk sportunyň dürli görnüşleriniň ösdürilmegine döwlet derejesinde ähmiýet berilýär. Bedewleriň asyl mekany bolan Türkmenistanda bu ugra degişli alnyp barylýan işler, atçylyk pudagynda halkara hyzmatdaşlyk täze derejä çykdy. Halkara maslahatlaryň we forumlaryň geçirilýän merkezi hökmünde ykrar edilen Watanymyzda atçylyk pudagynyň derwaýys meselelerini öz içine alýan maslahatlar, ahalteke bedewleriniň halkara gözellik bäsleşigi geçirilýär. Mälim bolşy ýaly, döwlet Baştutanymyz 13-nji fewralda geçirilen Ministrler Kabinetiniň giňişleýin mejlisinde 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň meýilnamasyny tassyklady.

...Aty seýislemek we çapmak boýunça baý tejribe toplan Gahryman Arkadagymyz bedewi gorgunyna goýberdi. Bu ajaýyp pursatda ösüşleriň belentliklerini nazarlaýan ýurdumyzyň okgunly gadamlary öz beýanyny tapýar. Şu günler gözel künjekde ynsan ruhuna ýakymly täsir edýän howa gurşawy emele geldi. Dag etekleriniň salkyn howasy, bu ýerleriň özboluşly tebigy aýratynlyklarynyň sazlaşygy göwün göteriji duýgulary döredýär.

Milli Liderimiz Hanbeg atly bedew bilen gezelenji tamamlap, “Garaşsyz, baky Bitarap Türkmenistan — bedew batly at-myradyň mekany” ýylynda atçylyk pudagy boýunça birnäçe halkara çäreleriň meýilleşdirilendigini aýdyp, olaryň guramaçylykly geçirilmegine, çärelerde behişdi bedewlerimiziň dünýädäki abraýynyň öz beýanyny tapmagyna, bu işlere degişli ugur boýunça bilim alýan talyplaryň işjeň çekilmegine zerur üns berilmelidigini nygtady. Gahryman Arkadagymyz bu babatda degişli ýolbaşçylara birnäçe maslahatlaryny berdi we alyp barýan işlerinde üstünlikleri arzuw edip, bu ýerden ugrady.

2026-njy ýylyň 25-nji fewralynda Tbilisiniň Kino öýünde döwletara gepleşikleri ösdürmekde, özara düşünişmegi berkitmekde hem-de ýurtlaryň we halklaryň arasynda berk ynamy pugtalandyrmakda medeniýetiň möhüm ornuny açyp görkezýän «Medeniýet dünýäni halas eder» atly gruzin dokumental filmiň ilkinji görkezilişi geçirildi. Kinoflmde Türkmenistanyň, Hytaýyň we Gruziýanyň medeniýetleriniň köpdürliligi görkezilip, olaryň medeniýetara gepleşikleri ösdürmäge we ynsanperwer hyzmatdaşlygy berkitmäge goşýan goşantlaryna aýratyn üns berilýär.

Bu çärä Türkmenistanyň Gruziýadaky Ilçisi D.Seýitmämmedow, Hytaý Halk Respublikasynyň Gruziýadaky Ilçisi Ç.Szýan, Gruziýanyň Parlamentiniň Bilim, ylym we ýaşlar meseleleri baradaky komitetiniň agzasy W.Božadze, filmiň režissýory T.Malaniýa, şeýle hem Gruziýanyň ylmy we döredijilik intellegensiýa wekilleri gatnaşdylar.

Türkmenistanyň Gruziýadaky Ilçisi D.Seýitmämmedow öz çykyşynda türkmen-gruzin gatnaşyklaryny çuňlaşdyrmakda ýokary derejeli saparlaryň, şeýle hem medeni-ynsanperwer hyzmatdaşlygy, medeniýet işgärleriniň döredijilikli özara gatnaşyklary üçin şertleriň döredilmegi we ylym-bilim ulgamyndaky hyzmatdaşlygyň berkidilmeginiň uly orun tutýandygyny belledi.

Ol häzirki wagtda parahatçylyk we ynyşmak aýratyn ähmiýete hem-de gymmata eýe bolýandygyny aýtdy. Ilçi bu filmiň halklary has-da ýakynlaşdyrmak we parahatçylygy berkitmek üçin berk binýat bolup durýan medeni diplomatiýanyň ösmegine uly goşant goşjakdygyna ynam bildirdi.

Mundan başga-da çykyş edenler, ýurtlaryň we halklaryň arasynda parahatçylykly hyzmatdaşlygy ösdürmek boýunça tagallalary birleşdirmekde medeniýetiň möhüm guraly hökmünde ägirt uly orny barada nygtap geçdiler.

Türkmenistanyň Tennis federasiýasy

Bahreýniň paýtagty Manama şäherinde 13 döwletiň wekilleriniň gatnaşmagynda 14 ýaşdan uly bolmadyk ýetginjekleriň arasynda geçirilen tennis boýunça Günbatar we Merkezi Aziýa çempionatynda Türkmenistanyň ýaş tennisçileri öz çykyşlaryny ajaýyp üstünlik bilen tamamladylar.

Halkara tennis federasiýasynyň (ITF) hünär derejesine eýe bolan we 2027-nji ýylyň «Wimbledon» hem-de «Australian Open» ýetginjekler ýaryşlaryna saýlama tapgyrlarynyň biri bolup durýan iki hepdelik «ITF Asia 14&U Development Championships» bäsleşiginiň jemleri boýunça ildeşlerimiz ýekelikde we jübütleýin ýaryşlarda hormat münberiniň iň ýokarky basgançagyna iki gezek göterilmegi başardylar.

Ýekelikdäki ýaryşlarda Aşgabat şäherindäki 87-nji orta mekdebiň 7-nji synp okuwçysy Näzli Hudaýgulyýewa altyn medalyň ikisini eýeledi. Tälimçiler Meýlis Orazmuhammedowyň we Ýuriý Rogusskiýniň şägirdi birinji hepdedäki final duşuşygynda Iordaniýanyň wekili Aýasofiýa Gokaşaudan 0:6, 6:1, 6:3 hasabynda üstün çykdy. Ýaryşyň ikinji hepdesinde ol Taliýa Al-Armutini (Iordaniýa) 6:2, 6:0 we Mariam Kamareddineni (Liwan) 6:3, 6:2 hasabynda ýeňip, ýene-de finala çykdy we aýgytly oýunda iordaniýaly tennisçi Aýasofiýa Gokaşauny 6:3, 6:2 hasabynda utdy.

Näzli «Jahan» döredijilik merkeziniň wekili, Türkmenistanyň at gazanan tälimçisi Jennet Hallyýewanyň we Ýuriý Rogusskiýniň ýolbaşçylygynda tälim alýan Sülgün Işangulyýewa bilen jübütleýin ýaryşlarda hem uly üstünlik gazandy. Birinji hepdedäki finalda Näzli bilen Sülgün liwanly tennisçiler Mariýa El Haçaçeni we Mariam Kamareddineni 6:3, 7:5 hasabynda ýeňlişe sezewar etdiler. Çempionatyň ikinji hepdesinde türkmen jübüti ýarym finalda Jana Hakim we Fatima Albaajari (Saud Arabystany) 6:2, 6:2 hasabynda, 1-nji orun ugrundaky aýgytly duşuşykda bolsa Mariam Kamareddine / Mariýa El Haçaçe (Liwan) jübütini 6:3, 6:3 hasabynda ýeňdiler.

Şeýlelikde, iki hepdelik ýaryşlar tapgyrynyň doly çempiony bolan we jemi dört altyn medaly eýelän Näzli Hudaýgulyýewa özüniň öňdebaryjy derejesini resmi taýdan tassyklady we Aziýa çempionatynyň final tapgyryna gatnaşmaga hukuk gazandy. Şu günki günde 13 ýaşly tennisçimiz 14 ýaşdan uly bolmadyk türgenleriň arasyndaky Aziýa ýetginjekler görkezijisinde 9-njy orny eýeleýär.

14 ýaşdan uly bolmadyk ýetginjekleriň arasyndaky 2026-njy ýylyň Aziýa çempionaty (ITF Asia 14&U Development Championships) abraýly sebit ýaryşy bolup, ol Kamboja (Günorta, Günorta-Gündogar we Gündogar Aziýa) hem-de Bahreýn (Günbatar we Merkezi Aziýa) saýlama tapgyrlaryny öz içine alýar. Iň ökde türgenler Aziýa çempionatynyň final tapgyrynda çykyş ederler we onuň netijeleri boýunça 2027-nji ýylyň «Wimbledon» hem-de «Australian Open» ýetginjekler ýaryşlaryna gatnaşmaga hukuk berýän ýollanmalar ugrunda bäsleşerler.

Türkmen tennisçileriniň Manamadaky bu üstünligi ýurdumyzda köpçülikleýin sportuň we ýokary netijeli sportuň ösdürilmegi boýunça durmuşa geçirilýän döwlet syýasatynyň netijeliliginiň, şeýle hem milli tennis mekdebiniň ýokary mümkinçilikleriniň nobatdaky subutnamasydyr.

«AA»-nyň habarçysy

Hormatly Prezidentimiz Serdar Berdimuhamedow Bruneý-Darussalam Döwletiniň Soltany Hajy Hassanal Bolkiaha Bruneý-Darussalam Döwletiniň Garaşsyzlyk güni mynasybetli tüýs ýürekden gutlaglaryny we iň gowy arzuwlaryny iberdi.

Döwlet Baştutanymyz mümkinçilikden peýdalanyp, Soltan Hajy Hassanal Bolkiaha tüýs ýürekden berk jan saglyk, bagtyýarlyk, abadançylyk, Bruneý-Darussalam Döwletiniň halkyna bolsa parahatçylyk, ösüş hem-de rowaçlyk arzuw etdi.

2026-njy ýylyň 17-nji fewralynda Ženewada BMG-niň Ýewropa ykdysady komissiýasynyň (ÝYK) Içerki ulag boýunça komitetiniň (IUK) 88-nji mejlisi öz işine başlady. Bu komitet ulag we ulag syýasatynyň ösdürilmegi boýunça esasy halkara meýdançalarynyň biridir. Bu barada Türkmenistanyň DIM-niň web-saýtynda habar berilýär. 

Içerki ulag boýunça komitetiň häzirki 88-nji mejlisi döwletleriň ulag edaralarynyň ýolbaşçylaryny, halkara guramalaryň ýolbaşçylaryny, degişli düzümleriň wekillerini, ulag işewürliginiň we bilermenler jemgyýetçiliginiň agzalaryny birleşdirýär. Çärä Ministrler Kabinetiniň Başlygynyň Оrunbasary B.Annaýewiň ýolbaşçylygyndaky Türkmenistanyň wekiliýeti gatnaşýar.

Gün tertibiniň ileri tutulýan meseleleriniň hatarynda daşamalaryň awtomatlaşdyrylmagy, infrastruktura sanlylaşdyrmasy, halkara ulag geçelgeleriniň ösdürilmegi hem-de kadalaşdyryjy-hukuk binýadynyň utgaşdyrylmagy bar.

Mejlis «Geljekki içerki ulag üçin innowasiýalary ilerletmek» diýen umumy tema boýunça geçirilýär we innowasiýalar, awtomatlaşdyrma, sanlylaşdyrma, infrastruktura ösüşi hem-de halkara ulag ulgamlarynyň durnuklylygyny ýokarlandyrmak meselelerine bagyşlanýar.

Ýokary derejeli mejlisiň çäklerinde akylly ulag çözgütleriniň ornaşdyrylmagy, sanly özara baglanyşyklylyk we durnukly söwda bähbitlerine laýyklykda ulag baglanyşygyny berkitmek boýunça ministrler derejesindäki panel maslahatlary geçirildi.

Ýokary derejeli mejlisde çykyş eden Türkmenistanyň wekiliýetiniň ýolbaşçysy ýurdumyzda ulag ulgamynyň sanlylaşdyrylmagynyň döwlet syýasatynyň strategik ileri tutulýan ugrudygyny belledi. Şeýle hem elektron resminama dolanyşygynyň kadalaşdyryjy-hukuk binýadynyň ulgamlaýyn döwrebaplaşdyrylmagyna, döwletara maglumat alyş-çalyş mehanizmleriniň ornaşdyrylmagyna hem-de «Demirgazyk-Günorta» we «Günbatar-Gündogar» ugurlary boýunça sanly ulag geçelgeleriniň döredilmegine aýratyn ähmiýet berildi.

Mundan başga-da, BMG-niň Ýewropa ykdysady komissiýasy bilen amaly hyzmatdaşlyk, şol sanda multimodal daşamalaryň sanlylaşdyrylmagy we maglumatlaryň awtomatlaşdyrylan alyş-çalyşygy boýunça hyzmatdaşlyk aýratyn bellenildi.

Çykyşda milli başlangyçlaryň durnukly ösüş boýunça ählumumy gün tertibi bilen arabaglanyşygy, hususan-da, Türkmenistanyň başlangyjy esasynda yglan edilen 2026-2035-nji ýyllar üçin Durnukly ulagyň onýyllygy bilen sazlaşygy nygtaldy.

Mejlisiň işi 2026-njy ýylyň 20-nji fewralyna çenli dowam eder.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Amerikanyň Birleşen Ştatlaryna sapary başlandy. Türkmenistan bilen ABŞ-nyň arasynda dürli ugurlarda netijeli hyzmatdaşlyk alnyp barylýar. Bu bolsa gatnaşyklary has-da öňe ilerletmekde möhümdir. Gahryman Arkadagymyzyň dostlukly ýurda şu gezekki sapary ikitaraplaýyn hyzmatdaşlykda täze sahypany açar.

Türkmen halkynyň Milli Lideri ir bilen Halk Maslahatynyň Diwanyndan çykyp, Amerikanyň Birleşen Ştatlaryna sapar bilen ugramak üçin paýtagtymyzyň Halkara howa menziline geldi. Gahryman Arkadagymyz bu ýerden ABŞ-a ugrady.

Mälim bolşy ýaly, Türkmenistan bilen ABŞ-nyň arasyndaky hyzmatdaşlyk hoşniýetlilik we deňhukuklylyk ýörelgelerine esaslanýar. Birnäçe ugurlary öz içine alýan netijeli gatnaşyklar häzirki wagtda ösüşiň täze derejesine çykýar. Şunda bu ýurduň dünýä belli kompaniýalarynyň birnäçesi ýurdumyzda oba hojalygy, senagat ugurlary boýunça bilelikdäki taslamalaryň durmuşa geçirilmegine işjeň gatnaşýar.

Türkmenistanyň we Amerikanyň Birleşen Ştatlarynyň işewür düzümleriniň arasyndaky gatnaşyklar okgunly ösdürilýär. Munuň özi birek-birege hormat goýmak, ynanyşmak esasynda ýola goýulýan hyzmatdaşlygyň uly geljeginiň bardygyny alamatlandyrýar. Iri amerikan kompaniýalary dünýäde ygtybarly hyzmatdaş hökmünde ykrar edilen Türkmenistanda maýa goýum taslamalarynyň durmuşa geçirilmegine gatnaşmaga uly gyzyklanma bildirýärler. Bu bolsa özara bähbitli gatnaşyklaryň mundan beýläk-de ilerledilmegine giň ýol açýar.

Gahryman Arkadagymyzyň Amerikanyň Birleşen Ştatlaryna bu sapary “Garaşsyz, baky Bitarap Türkmenistan — bedew batly at-myradyň mekany” ýylynyň şanly wakalarynyň üstüni ýetirip, iki ýurduň arasyndaky hyzmatdaşlygyň mundan beýläk-de sazlaşykly ösdürilmegine ýardam eder.

Türkmen halkynyň Milli Lideriniň ABŞ-a sapary dowam edýär.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onda ýurdumyzyň harby we hukuk goraýjy edaralarynda şu ýylyň ýanwar aýynda alnyp barlan işleriň netijelerine seredildi. Şeýle hem Garaşsyz döwletimizde howpsuzlygy, asudalygy üpjün etmäge, harby we hukuk goraýjy edaralaryň maddy-enjamlaýyn binýadyny berkitmäge hem-de olaryň işini has-da kämilleşdirmäge degişli meseleleriň birnäçesi ara alnyp maslahatlaşyldy.

Ilki bilen, Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçlerini ösdürmegiň maksatnamasynda kesgitlenen wezipeleri ýerine ýetirmek boýunça ýanwar aýynda alnyp barlan işler barada hasabat berdi. Şeýle hem Watan goragçylarynyň güni mynasybetli açylyp ulanmaga berlen gulluk we ýaşaýyş-durmuş maksatly binalar, şol sanda Lebap welaýatynda gurlan Türkmenistanyň Ýaragly Güýçleriniň harby bölümleriniň täze binalar hem-de desgalar toplumy barada aýdyldy. Şunuň bilen baglylykda, Döwlet howpsuzlyk geňeşiniň sekretary, goranmak ministri Ýaragly Güýçleriň harby bölümleriniň täze binalar we desgalar toplumynyň açylyşyna ak pata berendigi üçin döwlet Baştutanymyza ähli harby gullukçylaryň adyndan ýene-de bir gezek hoşallyk bildirdi.

Hormatly Prezidentimiz hasabaty diňläp, ýurdumyzyň Ýaragly Güýçleri üçin harby hünärmenleri taýýarlamak, Milli goşunymyzyň maddy-enjamlaýyn binýadyny berkitmek, harby gullukçylaryň ýaşaýyş-durmuş şertlerini ýokarlandyrmak boýunça alnyp barylýan işleri mundan beýläk hem dowam etdirmegiň möhümdigini belledi hem-de bu babatda Döwlet howpsuzlyk geňeşiniň sekretary, goranmak ministrine birnäçe anyk tabşyryklary berdi.

Baş prokuror B.Muhamedow ýurdumyzda kanunlaryň ýerine ýetirilişine gözegçiligi amala aşyrmak maksady bilen, şu ýylyň ýanwar aýynda görlen çäreler barada hasabat berdi. Şeýle hem prokuratura edaralaryna sanly ulgamy ornaşdyrmak, işgärleriň hünär derejesini ýokarlandyrmak boýunça alnyp barylýan işleriň barşy hakynda hasabat berildi. Şunuň bilen birlikde, hasabatda Balkan welaýatynyň Esenguly etrap prokuraturasynyň täze edara binasynyň ulanmaga berlendigi aýdyldy.

Hormatly Prezidentimiz hasabaty diňläp, ýurdumyzda kanunylygy hem-de hukuk tertibini pugtalandyrmagyň, kanunlaryň berjaý edilişine gözegçiligi döwrüň talaplaryna laýyklykda kämilleşdirmegiň möhüm wezipe bolup durýandygyny belledi hem-de Baş prokurora birnäçe görkezmeleri berdi.

Içeri işler ministri M.Hydyrow ýolbaşçylyk edýän düzümleri tarapyndan şu ýylyň ýanwarynda ýerine ýetirilen işleriň netijeleri, hususan-da, ýurdumyzda hukuk bozulmalarynyň we ýol-ulag hadysalarynyň öňüni almak, ýangyn howpsuzlygynyň kadalarynyň berjaý edilişine gözegçilik etmek boýunça görlen çäreler barada hasabat berdi. Şunuň bilen bir hatarda, ministr Watan goragçylarynyň güni mynasybetli paýtagtymyzyň Bagtyýarlyk etrabynyň “Çoganly” ýaşaýyş toplumynda Içeri işler ministrliginiň Mälikguly Berdimuhamedow adyndaky ýaşaýyş jaý toplumynyň nobatdaky tapgyrynyň, Içeri işler ministrliginiň Balkan welaýat Polisiýa müdirliginiň işgärleri üçin 4 gatly, 24 öýli 2 sany döwrebap ýaşaýyş jaýynyň, Mary welaýat Polisiýa müdirliginiň işgärleri üçin 4 gatly, 24 öýli täze ýaşaýyş jaýynyň açylyp ulanmaga berlendigi hakynda hasabat berdi.

Hormatly Prezidentimiz hasabaty diňläp, ýurdumyzda hukuk bozulmalarynyň öňüni almak, asudalygy we jemgyýetçilik tertibini üpjün etmek, kanunylygy has-da berkitmek boýunça alnyp barylýan işleri, ýol hereketiniň kadalarynyň, ýangyn howpsuzlygynyň düzgünleriniň berjaý edilmegini berk gözegçilikde saklamagyň möhümdigine ünsi çekdi hem-de bu babatda birnäçe anyk tabşyryklary berdi.

Ýokary kazyýetiň başlygy B.Hojamgulyýew kazyýet ulgamyny ösdürmegiň maksatnamasynyň çäklerinde şu ýylyň başyndan bäri alnyp barlan işler, hususan-da, milli kazyýet ulgamynyň işini kämilleşdirmek, kazylaryň hünär derejesini ýokarlandyrmak boýunça görülýän çäreler barada hasabat berdi.

Döwlet Baştutanymyz hasabaty diňläp, döwlet hem-de jemgyýetçilik bähbitlerini goramak, raýatlaryň hukuklaryny üpjün etmek boýunça alnyp barylýan işleri netijeli dowam etdirmegiň wajypdygyny nygtady. Şeýle hem hormatly Prezidentimiz kazylaryň bilim derejesini kämilleşdirmek boýunça okuwlary yzygiderli geçirmek babatda anyk görkezmeleri berdi.

Milli howpsuzlyk ministri N.Atagaraýew 2026-njy ýylyň ýanwar aýynda alnyp barlan işleriň netijeleri, ministrligiň öňünde durýan wezipeleri üstünlikli ýerine ýetirmek boýunça görülýän çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, N.Atagaraýewi, başga işe geçmegi sebäpli, milli howpsuzlyk ministri wezipesinden boşatdy we bu wezipä D.Meredowy belledi. D.Meredow harby kasama ygrarlylygyň nyşany hökmünde Türkmenistanyň Döwlet baýdagyna tagzym edip, halkymyza, Watanymyza, hormatly Prezidentimize wepalylyk barada dabaraly kasam etdi.

Döwlet Baştutanymyz ministrligiň täze wezipä bellenilen ýolbaşçysyna işinde üstünlikleri arzuw edip, öňde durýan ilkinji nobatdaky wezipelere ünsi çekdi hem-de bu düzümiň işini döwrebap derejede kämilleşdirmek boýunça degişli işleri alyp barmak babatda birnäçe anyk tabşyryklary berdi.

Döwlet serhet gullugynyň başlygy I.Ilamanow ýolbaşçylyk edýän düzüminde ýylyň başyndan bäri alnyp barlan işler, hususan-da, Watanymyzyň mukaddes serhetleriniň ygtybarly goralmagyny üpjün etmek boýunça görülýän çäreler barada hasabat berdi. Şeýle hem hasabatyň dowamynda gullugyň düzüminde täze serhet galasynyň açylyp ulanmaga berlendigi barada aýdyldy.

Ýurdumyzyň Ýaragly Güýçleriniň Belent Serkerdebaşysy hasabaty diňläp, Garaşsyz, hemişelik Bitarap Türkmenistanyň döwlet serhediniň goňşy ýurtlar bilen dost-doganlyk serhedidigini belledi hem-de onuň çäklerini pugta goramak maksady bilen alnyp barylýan işleri talabalaýyk dowam etdirmegi tabşyrdy.

Adalat ministri M.Taganow hasabat döwründe ýurdumyzyň kanunçylyk binýadyny has-da pugtalandyrmak, raýatlaryň hukuklary we borçlary barada wagyz-nesihat işlerini geçirmek boýunça ýerine ýetirilen işler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, kadalaşdyryjy hukuk namalarynyň taslamalarynyň, milli kanunçylygymyzyň halkara hukugyň kadalaryna doly laýyk getirilmegini üpjün etmegiň möhümdigini belledi hem-de ministre bu ugurda alnyp barylýan işleri dowam etdirmegi tabşyrdy.

Döwlet gümrük gullugynyň başlygy M.Hudaýkulyýew ýolbaşçylyk edýän düzümini ösdürmegiň maksatnamasynda kesgitlenen wezipeleri üstünlikli ýerine ýetirmek üçin şu ýylyň ýanwar aýynda alnyp barlan işleriň netijeleri, döwlet Baştutanymyzyň gullugyň işini kämilleşdirmek boýunça ozal beren tabşyryklarynyň ýerine ýetirilişi barada hasabat berdi. Şunuň bilen bir hatarda, Watan goragçylarynyň güni mynasybetli Balkan welaýatynyň Etrek etrabynda Döwlet gümrük gullugynyň Balkan welaýat gümrükhanasynyň işgärleri üçin niýetlenen 4 gatly, 24 öýli gulluk ýaşaýyş jaýynyň ulanmaga berlendigi barada aýdyldy.

Döwlet Baştutanymyz hasabaty diňläp, gümrük edaralarynyň işini mundan beýläk-de kämilleşdirmegi dowam etdirmegiň möhüm ähmiýetini belledi hem-de gümrük barlag nokatlaryndan geçirilýän harytlaryň gözden geçirilişini ýokary hilli guramak babatda gullugyň ýolbaşçysyna degişli tabşyryklary berdi.

Döwlet migrasiýa gullugynyň başlygy A.Sazakow ýolbaşçylyk edýän düzümi tarapyndan şu ýylyň başyndan bäri ýerine ýetirilen işleriň netijeleri barada hasabat berdi. Şunuň bilen birlikde, Watan goragçylarynyň güni mynasybetli Döwlet migrasiýa gullugynyň Ahal welaýaty boýunça müdirliginiň Tejen etrap bölüminiň täze edara binasynyň açylyp ulanmaga berlendigi barada aýdyldy.

Döwlet Baştutanymyz hasabaty diňläp, bu düzümiň öňünde durýan wezipelere ünsi çekdi hem-de gullugyň ýolbaşçysyna ýurdumyzda migrasiýa kanunçylygynyň berjaý edilişini, migrasiýa babatda ýokary hilli hyzmatlary amala aşyrmak boýunça alnyp barylýan işleri yzygiderli gözegçilikde saklamagy tabşyrdy.

Hormatly Prezidentimiz Döwlet howpsuzlyk geňeşiniň agzalaryna ýüzlenip, goranyş häsiýetli Harby doktrinamyzyň talaplaryna laýyklykda, Garaşsyz, hemişelik Bitarap döwletimiziň harby howpsuzlygyny we bitewüligini ýokary derejede üpjün etmek, ýurdumyzyň goranmak ukybyny berkitmek, Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak babatda yzygiderli çäreleriň durmuşa geçirilýändigini aýtdy we bu işleriň mundan beýläk-de dowam etdiriljekdigini belledi.

Döwlet howpsuzlyk geňeşiniň mejlisinde başga-da birnäçe möhüm meselelere garaldy we olar boýunça degişli çözgütler kabul edildi.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisi jemläp, oňa gatnaşanlara berk jan saglyk, halkymyzyň asuda hem-de bagtyýar durmuşda ýaşamagy ugrunda alyp barýan jogapkärli gulluklarynda uly üstünlikleri arzuw etdi.

Şu gün hormatly Prezidentimiz Serdar Berdimuhamedow Ministrler Kabinetiniň giňişleýin mejlisini geçirdi. Onda 2025-nji ýylda ýurdumyzda alnyp barlan işleriň jemleri jemlenildi, Ministrler Kabinetiniň Başlygynyň orunbasarlarynyň, käbir ministrleriň, welaýatlaryň häkimleriniň hasabatlary diňlenildi. Şeýle-de Watanymyzy durmuş-ykdysady taýdan ösdürmek boýunça 2026-njy ýylda öňde durýan wezipeler, ýolbaşçylary wezipä bellemek we wezipeden boşatmak bilen bagly meseleler ara alnyp maslahatlaşyldy. Hökümetiň giňişleýin mejlisine Türkmenistanyň Mejlisiniň ýolbaşçylary, Döwlet howpsuzlyk geňeşiniň agzalary, welaýatlaryň, Aşgabat hem-de Arkadag şäherleriniň häkimleri, ýokary okuw mekdepleriniň rektorlary, köpçülikleýin habar beriş serişdeleriniň ýolbaşçylary we beýlekiler çagyryldy.

Döwlet Baştutanymyz mejlisiň gün tertibini yglan edip, Ministrler Kabinetiniň Başlygynyň orunbasary H.Geldimyradowa söz berdi. Wise-premýer 2025-nji ýylda milli ykdysadyýetimiziň makroykdysady görkezijileri barada hasabat berdi.

Bellenilişi ýaly, maksatnamalaýyn çäreleriň üstünlikli durmuşa geçirilmegi netijesinde, jemi içerki önümiň durnukly ösüşi üpjün edilip, ol 6,3 göterim artdy. Bu görkeziji senagat pudagynda 1,8 göterime, gurluşykda 7,9 göterime, ulag we aragatnaşyk pudagynda 9,8 göterime, söwdada 9,6 göterime, oba hojalygynda 7 göterime, hyzmatlar ulgamynda 7,5 göterime deň boldy. 2024-nji ýyl bilen deňeşdirilende, 2025-nji ýylda jemi öndürilen önüm 10,2 göterim artyp, ykdysadyýetiň pudaklarynda kadaly önümçilik netijeleri gazanyldy. Bölek satuw haryt dolanyşygynyň möçberi 13,2 göterim artdy. Ýurdumyzyň iri we orta kärhanalarynda ortaça aýlyk zähmet haky, 2024-nji ýyl bilen deňeşdirilende, 11,9 göterim ýokarlandy. Hasabat döwründe zähmet haklary, pensiýalar, döwlet kömek pullary, talyp haklary öz wagtynda maliýeleşdirildi.

2025-nji ýylda maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň meýilnamasy doly ýerine ýetirilip, ol 2024-nji ýyl bilen deňeşdirilende, 6 göterim artdy. Şeýle hem “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň” amala aşyrylyşy barada hasabat berildi.

Mejlisiň dowamynda wise-premýer «Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasynyň» taslamasy barada hasabat berdi. Bu resminama ministrlikler, pudaklaýyn dolandyryş edaralary, welaýatlaryň, Aşgabat we Arkadag şäherleriniň häkimlikleri bilen bilelikde işlenip taýýarlanyldy. Maksatnamanyň taslamasynda 2026-njy ýylda ýetilmeli makroykdysady görkezijiler, ykdysadyýetiň ähli pudaklary boýunça önümçilik meýilnamalary, ýerine ýetirilmeli işler, Aşgabat we Arkadag şäherleri, welaýatlar boýunça durmuş-ykdysady, maýa goýum görkezijileri bellenildi. Şeýle-de onda ilatymyzyň girdejilerini yzygiderli artdyrmak, ýaşaýyş-durmuş derejesini has-da gowulandyrmak bilen bagly çäreler göz öňünde tutuldy.

Maliýe we ykdysadyýet ministri M.Astanagulow geçen ýylda Döwlet býujetiniň ýerine ýetirilişi, özleşdirilen maýa goýumlar we Oba milli maksatnamasynyň durmuşa geçirilişi barada hasabat berdi.

Bellenilişi ýaly, 2025-nji ýylyň jemleri boýunça ýurdumyzyň baş maliýe meýilnamasynyň girdeji bölegi 101,5 göterim, çykdajy bölegi bolsa 99,7 göterim berjaý edildi. Hasabat döwründe ýerli býujetleriň girdeji bölegi 104,5 göterim, çykdajy bölegi bolsa 99,8 göterim ýerine ýetirildi. 2025-nji ýylda balans toparlarynyň jemi 141 mejlisi, şol sanda sebitlerdäki balans toparlarynyň 111 mejlisi geçirildi. Mejlisleriň dowamynda ministrlikleriň we pudaklaýyn dolandyryş edaralarynyň hem-de olaryň garamagyndaky edara-kärhanalaryň maliýe-hojalyk işleriniň netijelerine garaldy. Maliýeleşdirmegiň ähli çeşmeleriniň hasabyna milli ykdysadyýetimizi ösdürmäge gönükdirilen maýa goýumlaryň möçberi, 2024-nji ýyl bilen deňeşdirilende, 6 göterim artdy we ol jemi içerki önümiň 16,6 göterimine deň boldy. Özleşdirilen düýpli maýa goýumlaryň 49,1 göterimi önümçilik, 50,9 göterimi durmuş we medeni maksatly binalara gönükdirildi. Şeýle-de Oba milli maksatnamasyny durmuşa geçirmegiň çäklerinde ýerine ýetirilen işler barada hasabat berildi.

Merkezi bankyň başlygy T.Mälikow 2025-nji ýylda ýurdumyzyň banklary tarapyndan ýerine ýetirilen işleriň netijeleri barada hasabat berdi.

Nygtalyşy ýaly, 2026-njy ýylyň 1-nji ýanwary ýagdaýyna görä, bank ulgamy tarapyndan ykdysadyýete gönükdirilen karzlaryň galyndysy, geçen ýylyň degişli senesi bilen deňeşdirilende, 4,8 göterim artdy. Şeýle hem ykdysadyýetiň hususy bölegine berlen karzlaryň galyndysy, geçen ýylyň degişli senesine görä, 23 göterim ýokarlandy, fiziki şahslara berlen karzlar 25,4 göterim artdy. 2026-njy ýylyň 1-nji ýanwary ýagdaýyna görä, Türkmenistanyň Prezidentiniň degişli Kararlaryna laýyklykda, Aşgabat we Arkadag şäherlerinde, welaýatlarda raýatlara gozgalmaýan emlägi satyn almak üçin berlen karzlar 20,1 göterim köpeldi.

Statistika baradaky döwlet komitetiniň başlygy D.Amanmuhammedow ministrlikler we pudaklaýyn dolandyryş edaralary tarapyndan geçen ýylda meýilnamalaryň ýerine ýetirilişi barada hasabat berdi.

Bellenilişi ýaly, 2025-nji ýylyň netijeleri boýunça 76 milliard 527,1 million kub metr tebigy gaz, 8 million 382,3 müň tonna nebit çykaryldy. 2024-nji ýyl bilen deňeşdirilende, dizel ýangyjynyň öndürilişi 9,8 göterim, benziniň öndürilişi 6,2 göterim, kerosiniň öndürilişi 5,4 göterim, nebit bitumynyň öndürilişi 26,4 göterim, suwuklandyrylan uglewodorod gazlarynyň öndürilişi 5,2 göterim, sementiň öndürilişi 40,9 göterim, armatur, demir önümleriniň öndürilişi 22,3 göterim, süýji-köke önümleriniň öndürilişi 10,1 göterim, şöhlat önümleriniň öndürilişi 7,3 göterim, unaş önümleriniň öndürilişi 5 göterim, mesge ýagynyň öndürilişi 2,9 göterim artdy. Hasabat döwründe senagat önümleriniň gymmatlyk möçberi nah ýüplükler boýunça 11 göterim, nah matalar boýunça 16,7 göterim ýokarlandy.

2025-nji ýylyň jemleri boýunça ulag we aragatnaşyk pudagynda ulaglaryň ähli görnüşleriniň ýük dolanyşygy 3,7 göterim, ýolagçy dolanyşygy 5,3 göterim artdy. Aragatnaşyk hyzmatlarynyň möçberi 19,6 göterim ýokarlandy. Ýurdumyzyň oba hojalygynda öndürilen gök önümler, 2024-nji ýyl bilen deňeşdirilende, 11,8 göterim, bakja önümleri 11,7 göterim, ýeralma 4,7 göterim, ýumurtga 8 göterim, süýt 2,1 göterim artdy. 2025-nji ýylda ykdysadyýetiň döwlete dahylsyz böleginde hem oňyn görkezijiler gazanyldy.

Hormatly Prezidentimiz Ministrler Kabinetiniň agzalaryna ýüzlenip, “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny” üstünlikli durmuşa geçirmek maksady bilen, 2026-njy ýylda ýurdumyzy durmuş-ykdysady taýdan ösdürmegiň we maýa goýum Maksatnamasynyň taslamasynyň işlenip taýýarlanandygyny aýtdy. “Maksatnama laýyklykda, 2026-njy ýylda jemi içerki önümiň ösüş depginini 6,3 göterimde saklamak, milli ykdysadyýetimiziň pudaklaryny, ýurdumyzyň sebitlerini durnukly ösdürmek, önümçilik kärhanalaryny doly güýjünde işletmek, täze kärhanalary gurmagyň hasabyna 5 müň 300-e golaý täze iş ornuny döretmek, kiçi we orta telekeçiligi ösdürmek, jemi içerki önümiň düzüminde hususy pudagyň paýyny 72,9 göterime ýetirmek, şeýle hem 2026-njy ýylda ýurdumyzyň ykdysadyýetine maliýeleşdirmegiň ähli çeşmeleriniň hasabyna jemi 41,2 milliard manada golaý maýa goýumlary gönükdirmek meýilleşdirilýär” diýip, döwlet Baştutanymyz belledi. Şunuň bilen baglylykda, hormatly Prezidentimiz “Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasyny” tassyklamak hakynda Karara gol çekdi. Arkadagly Gahryman Serdarymyz wise-premýer H.Geldimyradowa ýüzlenip, 2022 — 2028-nji ýyllarda ýurdumyzy durmuş-ykdysady taýdan ösdürmegiň Maksatnamasynda 2026-njy ýyl üçin bellenen wezipeleri üstünlikli durmuşa geçirmek boýunça degişli işleri alyp barmagyň zerurdygyny nygtady.

“Milli ykdysadyýetimiziň senagatlaşma derejesini pugtalandyrmak, durnukly ösüşini üpjün etmek, ykdysadyýetde hususy bölegiň paýyny artdyrmak boýunça netijeli işleri dowam etdirmek, Döwlet býujetiniň girdejilerini artdyrmak, onuň çykdajylaryny maksatlaýyn peýdalanmak işlerine gözegçiligi güýçlendirmek möhümdir” diýip, hormatly Prezidentimiz aýtdy. Döwlet Baştutanymyz ilatymyzyň ýaşaýyş jaý şertlerini gowulandyrmak üçin ýeňillikli şertlerde karzlaryň berilmegini dowam etdirmegi, bankara elektron töleg ulgamyny yzygiderli kämilleşdirmegi, sanly ulgam arkaly ýerine ýetirilýän bank hyzmatlarynyň hilini ýokarlandyrmagy tabşyrdy. Şeýle hem ykdysadyýetimizi ösdürmäge maliýe goldawyny bermek, milli puluň hümmetini durnukly saklamak boýunça alnyp barylýan işleri netijeli dowam etdirmek tabşyryldy.

Ministrler Kabinetiniň Başlygynyň orunbasary B.Amanow ýurdumyzda nebitiň we gazyň çykarylyşyny artdyrmak, olary dünýä bazaryna çykarmagyň ugurlaryny giňeltmek boýunça 2025-nji ýylda ýerine ýetirilen işleriň jemleri barada hasabat berdi.

Bellenilişi ýaly, “Türkmennebit” döwlet konserni tarapyndan nebit çykarmagyň meýilnamasy 108,6 göterim ýerine ýetirildi. Hasabat döwründe nebiti gaýtadan işleýän zawodlar tarapyndan nebiti gaýtadan işlemegiň meýilnamasy 108,8 göterim boldy. Benzin öndürmegiň meýilnamasy 108,1 göterim, dizel ýangyjyny öndürmegiň meýilnamasy 101 göterim, nebit bitumyny öndürmegiň meýilnamasy 284,6 göterim, çalgy ýaglaryny öndürmegiň meýilnamasy 100 göterim, tebigy we ugurdaş gazy çykarmagyň meýilnamasy bolsa 101,7 göterim berjaý edildi. Şeýle-de suwuklandyrylan gazy öndürmegiň ösüş depgini 105,2 göterime deň boldy.

Hormatly Prezidentimiz hasabaty diňläp, B.Amanowy Türkmenistanyň Ministrler Kabinetiniň Başlygynyň orunbasary wezipesinden boşadyp, “Türkmennebit” döwlet konserniniň başlygy G.Agajanowy, şol bir wagtda, Ministrler Kabinetiniň Başlygynyň nebitgaz toplumy boýunça orunbasary wezipesine bellemek barada karara gelendigini aýtdy we degişli resminamalara gol çekdi.

G.Agajanow bildirilen uly ynam üçin hormatly Prezidentimize tüýs ýürekden hoşallyk bildirdi we bu jogapkärli wezipede tutanýerli zähmet çekjekdigine ynandyrdy hem-de Arkadagly Gahryman Serdarymyza berk jan saglyk, uzak ömür, il-ýurt bähbitli tutumly işleriniň mundan beýläk-de rowaçlyklara beslenmegini arzuw etdi. Şeýle hem döwlet Baştutanymyz A.Begliýewi, pensiýa gitmegi sebäpli, Türkmenistanyň Prezidentiniň nebitgaz meseleleri boýunça geňeşçisi wezipesinden boşadyp, degişli resminama gol çekdi.

Hormatly Prezidentimiz wise-premýer G.Agajanowa ýüzlenip, ýurdumyzyň nebitgaz toplumyny 2026-njy ýylda hem döwrebap derejede ösdürmek, tebigy gazyň daşarky bazarlara iberilýän möçberini artdyrmak we ugurlaryny köpeltmek, nebit ýataklaryny netijeli özleşdirmek, nebitgaz pudagynyň kärhanalarynyň önümçilik kuwwatyny artdyrmak üçin döwrebap tehnologiýalary ornaşdyrmak, “Galkynyş” gaz känini tapgyrlaýyn özleşdirmek boýunça alnyp barylýan işleri dowam etdirmegiň zerurdygyny belledi. “Türkmenistan — Owganystan — Pakistan — Hindistan gaz geçirijisiniň gurluşygyny, aýratyn-da, onuň möhüm bölegi bolan Arkadagyň ak ýoly bilen Serhetabat — Hyrat gaz geçirijisiniň gurluşygyny güýçli depginde alyp barmak, Türkmenbaşydaky nebiti gaýtadan işleýän zawodlar toplumynyň we Seýdidäki nebiti gaýtadan işleýän zawodyň önümçilik kuwwatyny ýokarlandyrmaga aýratyn üns bermek möhümdir” diýip, döwlet Baştutanymyz aýtdy. Şeýle-de hormatly Prezidentimiz gazylyp alynýan ýerasty baýlyklaryň geologiýa gözleg-barlag işlerini güýçlendirmegi, nebitgaz ylmyny kämilleşdirmegi, daşary döwletleriň abraýly ylmy-barlag merkezleri bilen hyzmatdaşlygy has-da ösdürmegi, bu ugurda hünärmenleriň hünär derejesini yzygiderli kämilleşdirmek boýunça alnyp barylýan işlere üns bermegi tabşyrdy.

Ministrler Kabinetiniň Başlygynyň orunbasary B.Annamämmedow gurluşyk we senagat toplumy tarapyndan 2025-nji ýylyň ýanwar — dekabr aýlarynda ýerine ýetirilen işleriň netijeleri barada hasabat berdi.

Bellenilişi ýaly, hasabat döwründe toplum tarapyndan öndürilen önümleriň we ýerine ýetirilen işleriň meýilnamasy 101,9 göterim berjaý edildi. Gurluşyk we binagärlik ministrligi boýunça öndürilen önümleriň, ýerine ýetirilen işleriň meýilnamasy 114,5 göterim, Senagat we gurluşyk önümçiligi ministrligi boýunça 109,7 göterim, Energetika ministrligi boýunça 107,1 göterim boldy. Awtomobil ýollarynyň gurluşygyny dolandyrmak baradaky döwlet agentligi tarapyndan ýerine ýetirilen işleriň meýilnamasy 104,2 göterim berjaý edildi. Aşgabat şäheriniň häkimligi boýunça ýerine ýetirilen işleriň möçberi 132 million manada deň boldy.

Hormatly Prezidentimiz hasabaty diňläp, “Türkmenhimiýa” döwlet konserniniň başlygy wezipesine R.Myradowy belläp, ony senagat we gurluşyk önümçiligi ministriniň orunbasary wezipesinden boşatmak barada karara gelendigini aýtdy we degişli resminama gol çekdi.

R.Myradow özüne bildirilen uly ynam üçin hoşallygyny beýan edip, pudagy mundan beýläk-de okgunly ösdürmek üçin gujur-gaýratyny, bilimini we başarnygyny gaýgyrmajakdygyna ynandyrdy hem-de Arkadagly Gahryman Serdarymyza berk jan saglyk, uzak ömür, halkymyzyň abadançylygynyň bähbidine alyp barýan işlerinde uly üstünlikleri arzuw etdi.

Hormatly Prezidentimiz ýurdumyzda awtomobil ýollaryny döwrebaplaşdyrmak, ýol-ulag ulgamynyň işini has-da kämilleşdirmek maksady bilen, Awtomobil ýollarynyň gurluşygyny dolandyrmak baradaky döwlet agentligini Türkmenistanyň Awtomobil ýollary ministrligine öwürmek barada karara gelendigini aýtdy. Döwlet Baştutanymyz awtomobil ýollary ministri wezipesine H.Kerimowy belläp, degişli resminamalara gol çekdi.

H.Kerimow bildirilen uly ynam üçin hormatly Prezidentimize tüýs ýürekden hoşallygyny beýan edip, bu jogapkärli wezipede yhlasly zähmet çekjekdigine ynandyrdy hem-de Arkadagly Gahryman Serdarymyza berk jan saglyk, uzak ömür, il-ýurt bähbitli işleriniň mundan beýläk-de rowaçlyklara beslenmegini arzuw etdi.

Hormatly Prezidentimiz wise-premýer B.Annamämmedowa ýüzlenip, ýurdumyzyň gurluşyk we senagat toplumynyň kärhanalaryny taslama kuwwatyna çykarmak boýunça alnyp barylýan işleri dowam etdirmegiň, önümçilik meýilnamalarynyň ýerine ýetirilişini berk gözegçilikde saklamagyň, gurluşygy alyp barmakda dünýäniň ösen tehnologiýalaryny we häzirki zaman usullaryny giňden peýdalanmagyň zerurdygyny belledi. Döwlet Baştutanymyz senagat we gurluşyk önümçiligi boýunça täze, döwrebap kärhanalary döretmegi dowam etdirmegi, içerki we daşary ýurt sarp edijilerini elektrik energiýasy bilen üpjün etmek üçin elektrik energiýasynyň öndürilişini yzygiderli artdyrmagy, täze elektrik stansiýalaryny gurmak, paýlaýjy ulgamlaryň tehniki ýagdaýyny gowulandyrmak boýunça işleri ilerletmegi tabşyrdy.

Himiýa senagatynyň kärhanalarynda öndürilýän himiýa önümleriniň daşary ýurtlara iberilýän möçberini artdyrmak boýunça netijeli işleri durmuşa geçirmek, ýurdumyzda täze awtomobil ýollaryny gurmak, döwrebaplaşdyrmak üçin pudagyň maddy-enjamlaýyn binýadyny berkitmek, şu ýyl açylyp ulanmaga berilmegi meýilleşdirilýän binalaryň we desgalaryň bellenen möhletde, ýokary hilli ulanmaga tabşyrylmagyny berk gözegçilikde saklamak tabşyryldy.

Ministrler Kabinetiniň Başlygynyň orunbasary N.Atagulyýew gözegçilik edýän ministrliklerinde we pudaklaýyn dolandyryş edaralarynda, telekeçilik ulgamynda geçen ýylyň ýanwar — dekabr aýlarynda alnyp barlan işleriň netijeleri barada hasabat berdi.

Söwda we daşary ykdysady aragatnaşyklar ministrligi boýunça söwda dolanyşygynyň ösüş depgini, 2024-nji ýylyň degişli döwri bilen deňeşdirilende, 118,8 göterime, öndürilen önümleriň ösüş depgini 101 göterime barabar boldy. 2024-nji ýylyň degişli döwri bilen deňeşdirilende, Dokma senagaty ministrligi boýunça önüm öndürmekde 106,3 göterim, şol sanda nah ýüplügiň önümçiliginde 111,7 göterim, nah matalaryň önümçiliginde 118,8 göterim, gön önümleriniňkide 111,4 göterim ösüş depgini gazanyldy. “Türkmenhaly” döwlet birleşigi boýunça önüm öndürmegiň meýilnamasy 102,2 göterim ýerine ýetirildi. Döwlet haryt-çig mal biržasy tarapyndan hasabat döwründe 299 birža söwdasy geçirilip, olarda 29 müň 975 şertnama hasaba alyndy.

2025-nji ýylyň ýanwar — dekabr aýlarynda Söwda-senagat edarasy boýunça ýerine ýetirilen işleriň ösüş depgini 104 göterime deň boldy. Hasabat döwründe 22 sergi, 10 maslahat geçirildi. Geçen ýylda Senagatçylar we telekeçiler birleşmesi boýunça oba hojalyk we azyk önümlerini öndürmegiň ösüş depgini 108,1 göterime, senagat önümlerini öndürmegiň ösüş depgini 106,7 göterime deň boldy.

Hormatly Prezidentimiz hasabaty diňläp, dünýä döwletleri bilen söwda-ykdysady gatnaşyklary giňeltmegiň, ýokary hilli önümleriň öndürilişini artdyrmagyň, azyk howpsuzlygyny berkitmegiň söwda toplumynyň öňünde durýan esasy wezipelerdigini aýtdy. “Içerki bazarlarda azyk we sarp ediş harytlaryny elýeterli bahalardan üpjün etmegi gözegçilikde saklamak, dokma senagatynyň kärhanalarynda ýokary hilli dokma önümlerini öndürmek, eksport edilýän harytlaryň möçberini hem-de görnüşini artdyrmak boýunça toplumlaýyn çäreleri görmek, haly önümlerini öndürmek we olaryň hilini gowulandyrmak boýunça netijeli işleri alyp barmak, çeper halyçylyk kärhanalarynyň maddy binýadyny, çig mal üpjünçiligini yzygiderli berkitmek zerurdyr” diýip, döwlet Baştutanymyz aýtdy. Şeýle-de hormatly Prezidentimiz Döwlet haryt-çig mal biržasynyň, Söwda-senagat edarasynyň işini netijeli guramagy, munuň üçin elektron söwdalary kämilleşdirmäge gönükdirilen işleri dowam etdirmegi, hususy pudagy ösdürmek boýunça alnyp barylýan işleri hemişe üns merkezinde saklamagy tabşyrdy.

Ministrler Kabinetiniň Başlygynyň orunbasary B.Seýidowa gözegçilik edýän ulgamynda 2025-nji ýylyň ýanwar — dekabr aýlarynda ýerine ýetirilen işleriň netijeleri barada hasabat berdi.

Bellenilişi ýaly, hasabat döwründe hormatly Prezidentimiziň ýiti zehininden dörän “Magtymguly — dünýäniň akyldary”, “Türkmenistanyň Bitaraplygy — parahatçylygyň we ynanyşmagyň aýdyň ýoly” atly kitaplarynyň tanyşdyrylyş dabaralary geçirildi. Halkara parahatçylyk we ynanyşmak ýyly, mukaddes Garaşsyzlygymyzyň 34 ýyllygy, Türkmenistanyň hemişelik Bitaraplygynyň şanly 30 ýyllygy, milli senenamamyzda göz öňünde tutulan baýramçylyklar, belli seneler mynasybetli dürli medeni çäreler we dabaralar geçirildi, medeni-durmuş maksatly binalaryň açylyp ulanmaga berilmegi mynasybetli dabaralar guraldy. Yglan edilen döredijilik bäsleşikleriniň jemleri jemlenildi. “Galkynyş” milli at üstündäki oýunlar toparynyň Monakonyň Monte-Karlo şäherinde geçirilen 47-nji halkara sirk sungaty festiwalynyň Baş baýragyna we ýörite baýraklara mynasyp bolmagyna bagyşlanan birnäçe dabaralar geçirildi.

Aşgabat şäherinde ýurdumyzyň ýaşlar simfoniki orkestriniň we birleşen çagalar horunyň “Parahatçylyk sazy, dostluk, doganlyk sazy” atly aýdym-sazly festiwaly, Ahal welaýatynda Medeniýet hepdeligi, dutarçy bagşy-sazandalaryň arasynda “Çalsana, bagşy!” bäsleşigi, höwesjeň aýdymçylaryň “Ýaňlan, Diýarym!” telebäsleşigi, estrada we höwesjeň aýdymçy ýaşlaryň arasynda “Ýylyň parlak ýyldyzy” bäsleşigi üstünlikli geçirildi. Türkmenistanyň Prezidentiniň yglan eden “Türkmeniň Altyn asyry” baýragyny almak ugrundaky bäsleşigiň jemleri jemlenildi.

Hasabat döwründe halkara hyzmatdaşlygyň çäklerinde köp sanly çäreler guraldy. Paýtagtymyzda “Parahatçylyk sazy” atly halkara festiwal, “Awaza” milli syýahatçylyk zolagynda “Awaza — dostluk mekany” atly halkara tans we folklor festiwaly, Merkezi Aziýa ýurtlarynyň hem-de Azerbaýjan Respublikasynyň milli günleri, sergilerdir konsertler ýokary guramaçylyk derejesinde geçirildi. Şeýle hem Türkmenistanda Liwiýa Döwletiniň Medeniýet günleri guraldy. Ýurdumyzyň medeniýet, sungat, döredijilik işgärleri Hytaý Halk Respublikasynda Türkmenistanyň Medeniýet ýyly mynasybetli geçirilen dabaralara, hormatly Prezidentimiziň Mongoliýa amala aşyran döwlet saparynyň dowamynda geçirilen medeni çärelere gatnaşdylar. 2025-nji ýylda Azerbaýjan Respublikasynyň Baku we Genje şäherlerinde, Özbegistan Respublikasynyň Daşkent hem-de Hywa şäherlerinde Türkmenistanyň Medeniýet günleri üstünlikli geçirildi. Döwletimizde gazanylan uly üstünlikler, özgerişler baradaky maglumatlar metbugat sahypalarynda, teleradioýaýlymlarda, internet sahypalarynda giňden beýan edildi.

Hormatly Prezidentimiz hasabaty diňläp, O.Hojanazarowy, pensiýa gitmegi sebäpli, Türkmenistanyň Telewideniýe, radiogepleşikler we kinematografiýa baradaky döwlet komitetiniň «Altyn asyr: Türkmenistan» teleradioýaýlymynyň başlygy wezipesinden boşadyp, bu wezipä P.Kakabaýewi belledi we ony şol komitetiň «Arkadag» teleýaýlymynyň başlygy wezipesinden boşatdy. Döwlet Baştutanymyz «Arkadag» teleýaýlymynyň başlygy wezipesine K.Nepesowy belledi hem-de degişli resminamalara gol çekdi.

Hormatly Prezidentimiz wise-premýer B.Seýidowa ýüzlenip, 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi, mukaddes Garaşsyzlygymyzyň şanly 35 ýyllyk baýramy mynasybetli çäreleri ýokary derejede geçirmek üçin taýýarlyk işlerini alyp barmagyň zerurdygyny nygtady. “Aýdym-saz sungatymyzy ösdürmek, medeni mirasymyzy düýpli öwrenmek, gorap saklamak, dünýä ýaýmak, syýahatçylyk işini kämilleşdirmek boýunça alnyp barylýan işleri netijeli dowam etdirmek möhümdir” diýip, döwlet Baştutanymyz aýtdy. Şeýle-de hormatly Prezidentimiz sanly muzeý ulgamyny ösdürmegi dowam etdirmegi, ýerlerde kitaphanalaryň, medeniýet öýleriniň kadaly işlemegini gözegçilikde saklamagy, teleradioýaýlymlarda ýaş nesliň aň-düşünjesini ösdürmäge niýetlenen gepleşikleri köpräk goýbermegi, Türkmen döwlet neşirýat gullugynyň işini yzygiderli kämilleşdirmegi tabşyrdy.

Ministrler Kabinetiniň Başlygynyň orunbasary B.Orazdurdyýewa gözegçilik edýän ulgamlarynda 2025-nji ýylda alnyp barlan işleriň netijeleri barada hasabat berdi.

Hasabat döwründe halkara ylmy-amaly, okuw-usuly maslahatlar, olimpiadalar geçirildi. Okuwçy we talyp ýaşlar halkara ders hem-de internet bäsleşiklerinde üstünlikli çykyş edip, dürli medallara mynasyp boldular. Ylym ulgamyny kämilleşdirmek, ylmy-barlaglaryň netijeliligini ýokarlandyrmak babatda degişli işler alnyp baryldy. Ylmyň ugurlary boýunça aspirantura, doktorantura kabul edildi, alymlyk derejesine dalaşgärler hasaba alyndy, dissertasiýalar goraldy. Ylymlar güni mynasybetli “Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar” atly halkara ylmy maslahat, ýaşlaryň arasynda ylmy işler boýunça bäsleşigiň ýeňijilerini sylaglamak dabarasy guramaçylykly geçirildi.

“Saglyk” Döwlet maksatnamasyna laýyklykda, saglygy goraýyş ulgamynda keselleriň öňüni almagyň, bejermegiň öňdebaryjy usullaryny amaly lukmançylyga ornaşdyrmak boýunça işler dowam etdirildi. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýardam bermeginde näsag çagalara dürli operasiýalar amala aşyrylyp, bejergiler geçirildi.

Hormatly Prezidentimiz hasabaty diňläp, B.Orazdurdyýewany Türkmenistanyň Ministrler Kabinetiniň Başlygynyň orunbasary wezipesinden boşatdy. Döwlet Baştutanymyz Ministrler Kabinetiniň Başlygynyň ylym, bilim, saglygy goraýyş, sport, ýaşlar we jemgyýetçilik toplumy boýunça orunbasary wezipesine B.Mämmedowy belläp, ony Türkmen döwlet binagärlik-gurluşyk institutynyň rektory wezipesinden boşatmak barada karara gelendigini aýtdy hem-de degişli resminamalara gol çekdi.

B.Mämmedow bildirilen uly ynam üçin döwlet Baştutanymyza tüýs ýürekden hoşallygyny beýan edip, bu jogapkärli wezipede tutanýerli zähmet çekjekdigine ynandyrdy hem-de Arkadagly Gahryman Serdarymyza berk jan saglyk, uzak ömür, il-ýurt bähbitli işleriniň mundan beýläk-de rowaçlyklara beslenmegini arzuw etdi.

Hormatly Prezidentimiz saglygy goraýyş we derman senagaty ministri M.Mämmedowy pensiýa gitmegi sebäpli wezipesinden boşadyp, bu wezipä M.Gaýypowy belledi we ony saglygy goraýyş we derman senagaty ministriniň orunbasary wezipesinden boşatdy hem-de degişli resminamalara gol çekdi.

M.Gaýypow bildirilen uly ynam üçin hormatly Prezidentimize tüýs ýürekden hoşallyk bildirdi we bu jogapkärli wezipede yhlasly zähmet çekjekdigine ynandyrdy hem-de döwlet Baştutanymyza berk jan saglyk, uzak ömür, il-ýurt bähbitli tutumly işleriniň rowaçlyklara beslenmegini arzuw etdi.

Hormatly Prezidentimiz wise-premýer B.Mämmedowa ýüzlenip, ýurdumyzda bilim edaralarynyň işini kämilleşdirmegiň, bilim tehnologiýalaryny giňden ornaşdyrmagy dowam etdirmegiň, hünär bilimini kämilleşdirip, hünärmenleri taýýarlamagyň hilini ýokarlandyrmagyň, alnyp barylýan ylmy-barlag işlerini ilerletmegiň, bu ugurda halkara hyzmatdaşlygyň gerimini giňeltmegiň möhümdigini aýtdy. Döwlet Baştutanymyz ilatyň saglygyny goramak babatda işleri dowam etdirmegi, ilata edilýän lukmançylyk hyzmatlarynyň netijeli we elýeterli bolmagyny üpjün etmäge aýratyn ähmiýet bermegi, derman senagatyny yzygiderli ösdürmegi, ýurdumyzda sporty ösdürmek boýunça alnyp barylýan maksatnamalaýyn işleri yzygiderli ilerletmegi tabşyrdy.

Ministrler Kabinetiniň Başlygynyň orunbasary M.Çakyýew gözegçilik edýän düzümlerinde 2025-nji ýylyň ýanwar — dekabr aýlarynda ýerine ýetirilen işleriň jemleri barada hasabat berdi.

Bellenilişi ýaly, ulag-kommunikasiýa toplumy boýunça ýerine ýetirilen işleriň we hyzmatlaryň ösüş depgini 113,2 göterime deň boldy. Awtomobil, demir ýol, howa, deňiz, derýa ulaglary arkaly ýükleri daşamagyň ösüş depgini 100,7 göterime, ýolagçy gatnatmagyň ösüş depgini bolsa 159,8 göterime barabar boldy. Hasabat döwründe Demir ýol ulaglary ministrligi boýunça ýerine ýetirilen hyzmatlaryň ösüş depgini 107,3 göterime, Awtomobil ulaglary ministrligi boýunça 116,2 göterime, «Türkmenhowaýollary» döwlet gullugy boýunça 108,6 göterime, Deňiz we derýa ulaglary döwlet gullugy boýunça 110,5 göterime deň boldy. Şeýle hem Aragatnaşyk ministrligi boýunça 119,6 göterim ösüş depgini gazanyldy.

Hormatly Prezidentimiz hasabaty diňläp, M.Çakyýewi Türkmenistanyň Ministrler Kabinetiniň Başlygynyň orunbasary wezipesinden boşatdy. Döwlet Baştutanymyz Ministrler Kabinetiniň Başlygynyň ulag we aragatnaşyk toplumy boýunça orunbasary wezipesine B.Annaýewi bellemek barada karara gelendigini aýdyp, degişli resminamalara gol çekdi.

B.Annaýew özüne bildirilen uly ynam üçin hoşallygyny beýan edip, toplumy mundan beýläk-de ösdürmek üçin gujur-gaýratyny, bilimini we başarnygyny gaýgyrmajakdygyna ynandyrdy hem-de Arkadagly Gahryman Serdarymyza berk jan saglyk, uzak ömür, halkymyzyň abadançylygynyň bähbidine alyp barýan işlerinde uly üstünlikleri arzuw etdi.

Hormatly Prezidentimiz wise-premýer B.Annaýewe ýüzlenip, ulag we aragatnaşyk toplumynyň möhüm toplumlaryň biri bolup durýandygyny, şoňa görä-de, ýolagçy, ýük dolanyşygynyň möçberini artdyrmak, üstaşyr we halkara ýük gatnawlaryny has-da giňeltmek üçin degişli işleri alyp barmagyň zerurdygyny belledi. “Sanly ykdysadyýeti ösdürmäge degişli işleri dowam etdirmek, sanly ykdysadyýet, emeli aň tehnologiýalary boýunça IT meýdançalary döretmek, bu ugurda hünärmenleri taýýarlamak babatda zerur işleri geçirmek we teklipleri taýýarlamak möhümdir” diýip, döwlet Baştutanymyz aýtdy. Hormatly Prezidentimiz ulaglaryň we aragatnaşygyň ähli görnüşleri babatda hyzmatlary yzygiderli ösdürmek, ýurdumyzyň demir ýollaryny döwrüň talabyna görä döwrebaplaşdyrmak, maddy-enjamlaýyn binýadyny yzygiderli berkitmek boýunça işleri dowam etdirmegi tabşyrdy.

Şeýle hem döwrebap awtobuslar, dürli görnüşli awtoulaglar bilen ilata edilýän hyzmatlaryň gerimini giňeltmek, «Türkmenhowaýollary» döwlet gullugynyň işini yzygiderli kämilleşdirmek, täze we ykdysady taýdan amatly bolan halkara ugurlar boýunça howa gatnawlaryny açmak boýunça netijeli işleri alyp barmak, Türkmenbaşy Halkara deňiz portunyň mümkinçiliklerini, «Balkan» gämi gurluşyk we abatlaýyş zawodynyň kuwwatyny doly güýjünde işletmek babatda işleri gözegçilikde saklamak tabşyryldy.

Soňra welaýatlaryň häkimleri hasabatlar bilen çykyş etdiler.

Ahal welaýatynyň häkimi T.Nurmyradow welaýatda 2025-nji ýylda ýerine ýetirilen işleriň netijeleri barada hasabat berdi. Bellenilişi ýaly, Oba milli maksatnamasyny durmuşa geçirmegiň çäklerinde geçen ýylda welaýatda iri önümçilik, medeni-durmuş maksatly binalaryň we desgalaryň birnäçesi gurlup ulanmaga berildi. Şunuň bilen birlikde, häzirki wagtda sebitde möwsümleýin oba hojalyk işleriniň dowam edýändigi, hususan-da, bugdaý ekilen meýdanlarda degişli ideg işleriniň alnyp barylýandygy, gowaçanyň, gök-bakja ekinleriniň ýazky ekişine taýýarlyk görülýändigi barada aýdyldy.

Balkan welaýatynyň häkimi H.Aşyrmyradow 2025-nji ýylda welaýatda ýerine ýetirilen işleriň netijeleri barada hasabat berdi. Hasabatda bellenilişi ýaly, “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasyny” durmuşa geçirmegiň çäklerinde 2025-nji ýylda welaýatda medeni-durmuş, önümçilik maksatly desgalar, ýaşaýyş jaýlary gurlup ulanmaga berildi. Şunuň bilen birlikde, häzirki wagtda sebitiň ekerançylyk meýdanlarynda möwsümleýin oba hojalyk işleri, hususan-da, bugdaýa ideg etmek, gowaçanyň, ýazlyk ýeralmanyň, beýleki gök-bakja ekinleriniň ekişine taýýarlyk işleri alnyp barylýar.

Daşoguz welaýatynyň häkimi D.Babaýew 2025-nji ýylda ýerine ýetirilen işleriň netijeleri barada hasabat berdi. Hasabatda nygtalyşy ýaly, “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasyna” laýyklykda, geçen ýylda welaýatda medeni-durmuş we önümçilik maksatly desgalar, ýaşaýyş jaýlary gurlup ulanmaga berildi. Dowam edýän möwsümleýin oba hojalyk işleriniň çäklerinde welaýatyň bugdaý ekilen meýdanlarynda degişli ideg işlerini geçirmäge taýýarlyk görülýär. Gowaçanyň we azyklyk ekinleriň ýazky ekişine taýýarlyk işleri alnyp barylýar.

Lebap welaýatynyň häkimi D.Genjiýew geçen ýyl welaýatda ýerine ýetirilen işleriň netijeleri barada hasabat berdi.

Bellenilişi ýaly, Oba milli maksatnamasynda göz öňünde tutulan wezipeleri üstünlikli ýerine ýetirmek maksady bilen, geçen ýyl sebitde medeni-durmuş we önümçilik maksatly desgalary, inženerçilik ulgamlaryny gurmak boýunça degişli işler alnyp baryldy. Häzirki wagtda dowam edýän möwsümleýin oba hojalyk işleriniň çäklerinde bugdaý ekilen meýdanlarda agrotehnikanyň kadalaryna laýyklykda ideg işleri ýerine ýetirilýär. Şunuň bilen birlikde, gowaçanyň, ýazlyk ýeralmanyň, gök-bakja ekinleriniň ýazky ekişine taýýarlyk görülýär.

Mary welaýatynyň häkimi D.Annaberdiýew 2025-nji ýylda ýerine ýetirilen işleriň netijeleri barada hasabat berdi. Bellenilişi ýaly, “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasyna” laýyklykda, birnäçe medeni-durmuş we önümçilik maksatly desgalar ulanmaga berildi. Şeýle hem häkim welaýatda dowam edýän möwsümleýin oba hojalyk işleri barada hasabat berdi. Häzirki wagtda welaýatyň bugdaý ekilen meýdanlarynda agrotehnikanyň kadalaryna laýyklykda ideg işleri alnyp barylýar. Gowaça ekiljek meýdanlary, pagta öndürijiler üçin ýokary hilli gowaça tohumyny, ekişde ulanyljak oba hojalyk tehnikalaryny möwsüme doly taýýar etmek boýunça zerur çäreler görülýär.

Hormatly Prezidentimiz welaýatlaryň, Aşgabat we Arkadag şäherleriniň häkimlerine ýüzlenip, “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny”, Oba milli maksatnamasyny üstünlikli durmuşa geçirmegiň, welaýatlarda we şäherlerde ýaşaýyş jaýlarynyň, hassahanalaryň, beýleki durmuş maksatly binalaryň gurluşygyna berk gözegçilik etmegiň möhümdigini belledi. Döwlet Baştutanymyz ilaty arassa agyz suwy, elektrik energiýasy, tebigy gaz bilen üpjün etmegi gowulandyrmak boýunça netijeli işleri dowam etdirmegi, arassaçylygy berjaý etmek, abatlaýyş işlerini wagtynda geçirmek üçin ähli çäreleri görmegi tabşyrdy. Şeýle-de welaýatlarda bugdaýyň, gowaçanyň, beýleki oba hojalyk ekinleriniň bol hasylyny ýetişdirmek üçin ideg işlerini agrotehnikanyň kadalaryna laýyklykda alyp barmak tabşyryldy.

Ministrler Kabinetiniň Başlygynyň orunbasary T.Atahallyýew gözegçilik edýän toplumynda 2025-nji ýylyň ýanwar — dekabr aýlarynda ýerine ýetirilen işleriň netijeleri, ýurdumyzyň welaýatlarynda oba hojalyk işleriniň geçirilişi barada hasabat berdi.

Nygtalyşy ýaly, oba hojalyk toplumy boýunça önümçiligiň ösüş depgini, 2024-nji ýylyň degişli döwri bilen deňeşdirilende, 113,2 göterime deň boldy. Bu görkeziji Oba hojalyk ministrligi boýunça 103,1 göterime, Daşky gurşawy goramak ministrligi boýunça 103,2 göterime, Suw hojalygy baradaky döwlet komiteti boýunça 114,7 göterime, “Türkmenpagta” döwlet konserni boýunça 131 göterime, “Türkmengallaönümleri” döwlet birleşigi boýunça 101 göterime, “Türkmenobahyzmat” döwlet birleşigi boýunça 100,8 göterime, Azyk senagaty döwlet birleşigi boýunça 109,6 göterime, Maldarçylyk we guşçulyk senagaty döwlet birleşigi boýunça 103,3 göterime, “Türkmen atlary” döwlet birleşigi boýunça 100,9 göterime deň boldy. Maýa goýum serişdelerini özleşdirmegiň meýilnamasy 267,9 göterim ýerine ýetirildi.

Häzirki wagtda möwsümleýin oba hojalyk işleri dowam edýär. Welaýatlaryň bugdaý ekilen meýdanlarynda agrotehnikanyň kadalaryna laýyklykda ideg etmek, gowaçanyň, ýeralmanyň, gök-bakja ekinleriniň ekiljek meýdanlaryny ekiş möwsümine, ekişde ulanyljak oba hojalyk tehnikalaryny, gerek bolan tohumlary taýýarlamak üçin degişli işler alnyp barylýar. Şeýle-de wise-premýer 2026-njy ýylyň dowamynda ýurdumyzda we daşary ýurtlarda geçirilmegi hem-de gatnaşylmagy meýilleşdirilýän atçylyk we atly sport ugurlary boýunça çäreleriň Maksatnamasynda göz öňünde tutulýan dabaraly çäreleri ýokary derejede geçirmek maksady bilen, döwlet Baştutanymyzyň garamagyna degişli Kararyň taslamasyny hödürledi.

Hormatly Prezidentimiz hasabaty diňläp, Ç.Babanyýazowy daşky gurşawy goramak ministri wezipesinden boşadyp, bu wezipä Ö.Goşjanowy belledi we ony daşky gurşawy goramak ministriniň orunbasary wezipesinden boşatmak barada karara gelendigini aýtdy hem-de degişli resminamalara gol çekdi.

Ö.Goşjanow bildirilen uly ynam üçin hormatly Prezidentimize tüýs ýürekden hoşallygyny beýan edip, bu jogapkärli wezipede yhlasly zähmet çekjekdigine ynandyrdy hem-de Arkadagly Gahryman Serdarymyza berk jan saglyk, uzak ömür, il-ýurt bähbitli işleriniň mundan beýläk-de rowaçlyklara beslenmegini arzuw etdi.

Döwlet Baştutanymyz B.Ataýewi Azyk senagaty döwlet birleşiginiň başlygy wezipesinden boşadyp, bu wezipä B.Tejenowy belledi we degişli resminamalara gol çekdi. B.Tejenow bildirilen ynam üçin hormatly Prezidentimize tüýs ýürekden hoşallyk bildirdi we bu jogapkärli wezipede tutanýerli zähmet çekjekdigine ynandyrdy hem-de Arkadagly Gahryman Serdarymyza berk jan saglyk, uzak ömür, il-ýurt bähbitli tutumly işleriniň mundan beýläk-de rowaçlyklara beslenmegini arzuw etdi.

Döwlet Baştutanymyz 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamasynyň işlenip taýýarlanandygyny aýtdy. Şunuň bilen baglylykda, hormatly Prezidentimiz ýylyň dowamynda ýurdumyzda, şeýle hem daşary ýurtlarda geçiriljek çärelere gowy taýýarlyk görmegi we olary ýokary derejede geçirmegi tabşyryp, bu ugurda taýýarlanan degişli resminama gol çekdi.

Döwlet Baştutanymyz wise-premýer T.Atahallyýewe ýüzlenip, ýurdumyzda oba hojalyk we azyk önümleriniň önümçiligini artdyrmagyň hasabyna azyk howpsuzlygyny berkitmek, oba hojalyk önümlerini gaýtadan işlemek we taýýar önümleri öndürmek boýunça önümçilikleri yzygiderli döwrebaplaşdyrmak babatda işleri dowam etdirmegiň möhümdigini belledi. “Ekin we öri meýdanlaryny maksadalaýyk, netijeli ulanmagy üns merkezinde saklamak, ýokary hasyl berýän ekinleriň we miweli baglaryň täze görnüşlerini döretmek, tohumçylyk işini kämilleşdirmek boýunça işleri alyp barmak, döwrebap tehnologiýalar esasynda maldarçylyk, guşçulyk pudagyny netijeli ösdürmek, dünýä standartlaryna laýyk gelýän, ýokary hilli önümleri öndürýän azyk senagatyna degişli täze kärhanalary gurmak boýunça işleri dowam etmek zerurdyr” diýip, Arkadagly Gahryman Serdarymyz aýtdy.

Hormatly Prezidentimiz oba hojalyk önümçiliginiň tehniki binýadyny berkitmek, ýüpekçiligi ösdürmek, ýokary hilli pile önümlerini öndürmek boýunça işleri dowam etdirmegi, önümçilige suw tygşytlaýjy tehnologiýalary ornaşdyrmak, goşmaça suw gorlaryny döretmek, ýerleriň melioratiw ýagdaýyny gowulandyrmak boýunça işleri netijeli durmuşa geçirmegi tabşyrdy. Ylmy edaralara oba hojalyk ekinleriniň hasylyny ýokarlandyrmak, täze ýerleri özleşdirmek babatda has netijeli işlemek barada tabşyryklar berildi. Şeýle-de daşky gurşawy gorap saklamak, ekologik abadançylygy üpjün etmek, ýurdumyzy bagy-bossanlyga öwürmek, ösümlik we haýwanat dünýäsini gorap saklamak hem-de baýlaşdyrmak, umuman, oba hojalyk pudagynyň önümçilik kuwwatyny doly peýdalanmak, ylmyň we tehnologiýalaryň iň soňky gazananlaryny ornaşdyrmak boýunça alnyp barylýan işleri dowam etdirmek tabşyryldy.

Ministrler Kabinetiniň Başlygynyň orunbasary, daşary işler ministri R.Meredow geçen ýylda Daşary işler ministrligi tarapyndan alnyp barlan işleriň netijeleri barada hasabat berdi.

Bellenilişi ýaly, döwlet Baştutanymyzyň tabşyryklaryny we öňde goýan wezipelerini ýerine ýetirmek maksady bilen, hasabat döwründe «Bitarap Türkmenistanyň daşary syýasat ugrunyň 2022 — 2028-nji ýyllar üçin Konsepsiýasyny” yzygiderli durmuşa geçirmek, ikitaraplaýyn we köptaraplaýyn görnüşde, abraýly sebit, halkara guramalaryň çäklerinde netijeli hyzmatdaşlygy ösdürmek boýunça degişli işler amala aşyryldy.

2025-nji ýylyň dowamynda hormatly Prezidentimiz döwlet, resmi we iş saparlarynyň 15-sini, ýagny Mongoliýa, Hytaý Halk Respublikasyna, Täjigistan Respublikasyna, Italiýa Respublikasyna, Amerikanyň Birleşen Ştatlaryna iki gezek, Özbegistan Respublikasyna iki gezek, Gazagystan Respublikasyna üç gezek, Ýaponiýa iki gezek, Russiýa Federasiýasyna iki gezek saparlary amala aşyrdy. Hasabat döwründe türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň daşary ýurtlara saparlarynyň 9-sy, ýagny Monako Knýazlygyna, Gazagystan Respublikasyna, Gyrgyz Respublikasyna, Özbegistan Respublikasyna, Fransiýa Respublikasyna, Russiýa Federasiýasynyň Tatarystan Respublikasyna, Azerbaýjan Respublikasyna iki gezek we Owganystana saparlary guraldy. Şeýle hem geçen ýylda daşary ýurtlaryň döwlet we hökümet Baştutanlarynyň Türkmenistana döwlet, resmi, iş saparlarynyň 31-si amala aşyryldy.

Abraýly sebitara we halkara guramalar bilen alnyp barylýan hyzmatdaşlygy ösdürmek ýurdumyzyň daşary syýasy strategiýasynyň möhüm ugurlarynyň biri bolup durýar. Şunuň bilen baglylykda, hormatly Prezidentimiz 2025-nji ýylyň 21 — 24-nji sentýabry aralygynda Birleşen Milletler Guramasynyň Baş Assambleýasynyň 80-nji ýubileý sessiýasynyň işine gatnaşdy we onuň çäklerinde birnäçe ýokary derejeli duşuşyklary geçirdi. Hasabat döwründe BMG-niň Baş sekretarynyň, Ýewropada Howpsuzlyk we Hyzmatdaşlyk Guramasynyň, Şanhaý Hyzmatdaşlyk Guramasynyň, Ykdysady Hyzmatdaşlyk Guramasynyň, Türki Döwletleriň Guramasynyň, Türki medeniýetiň halkara guramasynyň, Aziýada özara hyzmatdaşlyk we ynamy berkitmek çäreleri boýunça geňeşiň Baş sekretarlarynyň we beýleki halkara düzümleriň birnäçesiniň ýolbaşçylarynyň ýurdumyzda saparda bolandygy bellenildi.

2025-nji ýylda Daşary işler ministrliginiň üsti bilen 936 wekiliýetiň döwletimize sapar bilen gelendigi we ýurdumyzyň 1 müň 303 wekiliýetiniň daşary döwletlerde saparda bolandygy bu ugurdaky hyzmatdaşlygyň netijeli häsiýete eýediginiň aýdyň beýanydyr. Geçen ýylyň dowamynda sanly ulgam arkaly dürli derejedäki duşuşyklaryň 573-si geçirildi. Şeýle hem ýurdumyzda daşary ýurt döwletleri, halkara guramalar bilen bilelikde resmi gepleşiklerdir duşuşyklaryň 2 müň 794-si guraldy. 2025-nji ýylda Türkmenistanyň halkara gatnaşyklarynyň şertnama-hukuk binýadynyň üsti resminamalaryň 264-si bilen ýetirildi.

Daşary syýasat edaralarynyň ugry boýunça gatnaşyklar yzygiderli ösdürilýär. Hasabat döwründe Daşary işler ministrlikleriniň arasynda ikitaraplaýyn geňeşmeleriň birnäçesi geçirildi. Ýewropa Bileleşiginiň daşary işler we howpsuzlyk syýasaty boýunça ýokary wekili — Ýewropa Komissiýasynyň wise-prezidenti hem-de halkara hyzmatdaşlyk boýunça Ýewropa komissary bilen duşuşyklar guraldy.

Ýurdumyzyň daşary syýasy ugruny durmuşa geçirmekde ilçihanalaryň üsti bilen diplomatik gatnaşyklary pugtalandyrmaga uly ähmiýet berilýär. Şunuň bilen baglylykda, geçen ýylda 19 döwletiň Türkmenistanda täze bellenen Adatdan daşary we Doly ygtyýarly ilçileri ynanç hatlaryny gowşurdylar. Türkmenistanyň daşary ýurtlardaky Adatdan daşary we Doly ygtyýarly ilçileriniň 13-si ynanç hatlaryny gowşurdy hem-de konsullaryň 2-si resmi taýdan öz işine başlady. Türkmenistanyň daşary ykdysady gatnaşyklaryny ösdürmek maksady bilen, geçen ýylyň dowamynda ikitaraplaýyn hökümetara toparlaryň mejlisleriniň 14-si guraldy.

«Açyk gapylar» syýasatynyň çäklerinde 2025-nji ýylda iri halkara çäreleriň birnäçesi geçirildi. Şolaryň hatarynda “Awaza” milli syýahatçylyk zolagynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahaty, «Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek» atly halkara maslahat bar. Mälim bolşy ýaly, Türkmenistanyň başlangyjy boýunça BMG-niň Baş Assambleýasy 2025-nji ýyly «Halkara parahatçylyk we ynanyşmak ýyly» diýip yglan etdi. Şu mynasybetli dürli çäreleriň 100-e golaýy geçirildi. 12-nji dekabrda Aşgabat şäherinde Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli döwlet Baştutanlarynyň hem-de halkara guramalaryň ýolbaşçylarynyň derejesinde geçirilen halkara forum ýylyň esasy syýasy wakasy boldy.

Hormatly Prezidentimiz hasabaty diňläp, häzirki döwürde Türkmenistanyň dünýäde parahatçylygy, halkara durnuklylygy, durnukly ösüşi pugtalandyrmaga uly goşant goşýandygyny, bu ugurda netijeli işleri durmuşa geçirýändigini, ýurdumyzyň daşary syýasatynyň dünýä döwletleri we halkara guramalar bilen deňhukukly, özara bähbitli hyzmatdaşlygy ösdürmäge gönükdirilendigini aýtdy. Şunuň bilen baglylykda, döwlet Baştutanymyz wise-premýer, daşary işler ministrine dünýä döwletleri bilen syýasy-diplomatik, söwda-ykdysady, medeni-ynsanperwer, ylym-bilim ulgamlarynda netijeli gatnaşyklary berkitmegi dowam etdirmegi, ýylyň dowamynda göz öňünde tutulan halkara çärelere hem gowy taýýarlyk görmegi we olary ýokary derejede geçirmegi tabşyrdy.

Mejlisiň Başlygy D.Gulmanowa 2025-nji ýylda ýerine ýetirilen işleriň netijeleri barada maglumat berdi.

Bellenilişi ýaly, degişli döwürde milli parlamentiň 4 maslahaty geçirilip, Türkmenistanyň Kanunlarynyň 27-si, Mejlisiň kararlarynyň 23-si kabul edildi. Şolaryň hatarynda “Bitarap Türkmenistanyň parahatçylyk we ynanyşmak syýasatynyň hukuk esaslary hakynda” Türkmenistanyň Konstitusion kanuny, “Türkmenistanyň Raýat kodeksini tassyklamak we herekete girizmek hakynda”, “Kazyýet hakynda”, “Saýlawçylaryň bitewi döwlet sanawy hakynda”, “Türkmenistanyň Bitaraplygynyň 30 ýyllygyna” atly Türkmenistanyň ýubileý medalyny döretmek hakynda”, “Türkmenistanyň 2026-njy ýyl üçin Döwlet býujeti hakynda”, “Wirtual aktiwler hakynda”, “Ylmy intellektual eýeçilik hakynda”, «Ýük markalary hakynda halkara konwensiýanyň degişli Teswirnamasyna goşulmak hakynda», “Gazagystan Respublikasynyň, Gyrgyz Respublikasynyň, Täjigistan Respublikasynyň, Türkmenistanyň, Özbegistan Respublikasynyň we Hytaý Halk Respublikasynyň arasynda hemişelik hoşniýetli goňşuçylyk, dostluk we hyzmatdaşlyk hakynda Şertnamany tassyklamak hakynda”, “1993-nji ýylyň 22-nji ýanwaryndaky Raýat, maşgala we jenaýat işleri boýunça hukuk kömegi we hukuk gatnaşyklary hakynda Konwensiýa üýtgetmeleri girizmek hakyndaky Teswirnamany tassyklamak hakynda” Türkmenistanyň Kanunlary bar. Şunuň bilen birlikde, döwletimiziň hukuk ulgamyny täze taryhy döwrüň talaplaryna, halkara hukugyň umumy ykrar edilen kadalaryna laýyklykda kämilleşdirmek maksady bilen, jenaýat, arbitraž, raýat we jenaýat iş ýörediş, jenaýat-ýerine ýetiriş, maşgala, zähmet gatnaşyklary, salgytlar, administratiw önümçilik, awtomobil ulagy, aragatnaşyk, migrasiýa, içeri işler edaralary, gümrük meseleleri, döwlet pensiýa ätiýaçlandyrmasy bilen baglanyşykly hereket edýän birnäçe kanunçylyk namalaryna üýtgetmelerdir goşmaçalar girizildi.

Daşary ýurt döwletleriniň Türkmenistandaky Adatdan daşary we Doly ygtyýarly ilçileriniň 13-sinden ynanç hatlary kabul edildi. Dünýä döwletleriniň parlamentleriniň, ýurdumyzdaky daşary ýurt wekilhanalarynyň, halkara guramalaryň wekilleri bilen duşuşyklaryň 60-sy geçirildi. Olaryň dowamynda ikitaraplaýyn hyzmatdaşlyk meseleleri ara alnyp maslahatlaşyldy. Mejlisiň deputatlary we hünärmenleri kanun çykaryjylyk işini kämilleşdirmek, döwlet maksatnamalarynyň ýerine ýetirilmegini üpjün etmek boýunça ýurdumyzyň degişli döwlet edaralary tarapyndan halkara düzümler bilen bilelikde guralan maslahatlaryň 119-syna gatnaşdylar. Kanun çykaryjylyk işinde öňdebaryjy tejribäni öwrenmek maksady bilen, deputatlaryň daşary ýurtlara iş saparlarynyň 46-sy guraldy. Mundan başga-da, “Awaza” milli syýahatçylyk zolagynda geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň çäklerinde Parlament forumy, Türkmenistanyň Mejlisinde Bitaraplygyň dostlary toparyna agza ýurtlaryň parlament ýolbaşçylarynyň utgaşykly görnüşdäki ikinji duşuşygy geçirildi.

Hormatly Prezidentimiz ýurdumyzyň hukuk binýadyny berkitmek boýunça netijeli işleriň alnyp barylýandygyny, 2025-nji ýylda şu babatda Türkmenistanyň Kanunlarynyň 27-siniň kabul edilendigini, birnäçe kanunlara üýtgetmeleriň we goşmaçalaryň girizilendigini aýtdy. Döwlet Baştutanymyz kabul edilen kanunlaryň Garaşsyz Watanymyzyň mundan beýläk-de gülläp ösmegini, halkymyzyň abadan we bagtyýar durmuşda ýaşamagyny üpjün etjekdigini belledi.

Hormatly Prezidentimiz mejlisi dowam edip we oňa gatnaşyjylara ýüzlenip, geçen ýylyň başynda welaýatlarda ähli görkezijiler boýunça iň ýokary netijeleri gazanan etraby we etrap hukukly şäheri kesgitlemek üçin bäsleşigiň yglan edilendigini belledi. Ýakynda Türkmenistanyň Kärdeşler arkalaşyklarynyň ýolbaşçylygynda ýörite topar bu bäsleşigiň jemlerini jemledi. Şunuň bilen baglylykda, döwlet Baştutanymyz hasabat bermek üçin Kärdeşler arkalaşyklarynyň Milli merkeziniň başlygy O.Berdiliýewa söz berdi.

Bellenilişi ýaly, Arkadagly Gahryman Serdarymyzyň «Watan diňe halky bilen Watandyr! Döwlet diňe halky bilen döwletdir!» diýen ýörelgesi Gahryman Arkadagymyzyň «Döwlet adam üçindir!» diýen şygarynyň mynasyp dowamyna öwrülip, giň gerimli özgertmelere, adam hakyndaky aladalara esaslanýan beýik işlere giň ýol açýar. Ajaýyp zamanada, bagtyýar durmuşda ýaşaýan agzybir halkymyz bedew batly ösüşler bilen ynamly öňe barýan Watanymyzda gazanylýan ajaýyp üstünliklere, ýetilýän belent sepgitlere tüýs ýürekden guwanýar. Döwlet Baştutanymyzyň Buýrugyna laýyklykda, degişli topar tarapyndan tassyklanylan tertipde degişli işler alnyp baryldy. Onuň netijeleri boýunça “Halkara parahatçylyk we ynanyşmak ýyly” şygary astynda geçen 2025-nji ýylda ýurdumyzyň iň gowy etraby kesgitlenildi. Bäsleşigiň netijeleri boýunça durmuş, ykdysady we medeni görkezijiler babatda iň gowy netijeleri gazanan Daşoguz welaýatynyň Köneürgenç etraby onuň ýeňijisi diýlip kesgitlenildi.

Hormatly Prezidentimiz Daşoguz welaýatynyň Köneürgenç etrabyny 2025-nji ýylyň jemleri boýunça geçirilen bäsleşikde ýeňiji bolan etrap diýip yglan etmek we bu etrabyň häkimligini bir million amerikan dollary möçberinde pul baýragy bilen sylaglamak hakynda, şeýle hem 2026-njy ýylda etraplaryň we etrap hukukly şäherleriň arasynda täze bäsleşigi yglan etmek hakynda Buýruklara gol çekdi.

Arkadagly Gahryman Serdarymyz mejlise gatnaşyjylara ýüzlenip, halkymyzyň tutanýerli zähmeti netijesinde Halkara parahatçylyk we ynanyşmak ýylynda uly üstünlikleriň gazanylandygyny, bellenen meýilnamalaryň ýerine ýetirilendigini, döwrebap kanunlary taýýarlamak hem-de durmuşa ornaşdyrmak boýunça işleriň dowam etdirilendigini aýtdy.

“Ykdysadyýetimiziň ýokary ösüş depginini saklap galdyk. Jemi içerki önümiň ösüşi 6,3 göterim, şol sanda ol senagatda 1,8 göterim, söwdada 9,6 göterim, oba hojalygynda bolsa 7 göterim boldy. Maýa goýumlar 6 göterim artdy. Hasabat döwründe iri we orta kärhanalarda jemi 7 müňe golaý täze iş orny döredildi” diýip, döwlet Baştutanymyz belledi. Hormatly Prezidentimiz geçen ýyl maliýeleşdirmegiň ähli çeşmeleriniň hasabyna 116 sany önümçilik we medeni-durmuş maksatly desganyň, umumy meýdany 645 müň inedördül metr bolan ýaşaýyş jaýlarynyň ulanmaga berlendigini, möhüm ähmiýetli birnäçe desgalaryň gurluşygyna badalga berlendigini, ýurdumyzyň taryhynda ilkinji «akylly» şäher bolan Arkadag şäheriniň ikinji tapgyrynyň gurluşygynyň dowam etdirilendigini aýtdy. Daýhanlarymyz ekinlerden bol hasyl alyp, ýurdumyzyň azyk howpsuzlygyny üpjün etdiler.

“Halkara parahatçylyk we ynanyşmak ýyly hem-de hemişelik Bitaraplygymyzyň 30 ýyllygy mynasybetli birnäçe halkara çäreler guraldy. Halkara Bitaraplyk güni mynasybetli döwlet Baştutanlarynyň we halkara guramalaryň ýolbaşçylarynyň gatnaşmagynda halkara forum ýokary derejede geçirildi. Ýurdumyzyň abraýyna abraý goşýan möhüm ähmiýetli Kararnamalar, resminamalar kabul edildi” diýip, döwlet Baştutanymyz sözüni dowam etdi. “Biz her ýyly belli bir şygar boýunça geçirýäris. Şu ýyl «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edildi. Bu şygar uly many-mazmuna eýe bolup, berkarar döwletimiziň at-abraýyny has-da ýokarlandyrmaga, ata Watanymyzyň mundan beýläk-de gülläp ösmegine gönükdirilen işleri amala aşyrmaga ruhlandyrýar. Munuň özi biziň üstümize uly jogapkärçiligi ýükleýär. Şoňa görä-de, bu şygary iş ýüzünde durmuşa geçirmek üçin tutanýerli zähmet çekmelidiris” diýip, Arkadagly Gahryman Serdarymyz nygtady.

«Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasyna» laýyklykda, şu ýyl umumy meýdany 900 müň inedördül metrden gowrak ýaşaýyş jaýlaryny, 3 müň 380 orunlyk umumybilim edaralaryny, 1 müň 80 orunlyk mekdebe çenli çagalar edaralaryny gurup ulanmaga bermek meýilleşdirilýär. Halkymyzyň ýaşaýyş-durmuş şertlerini gowulandyrmak üçin bu Maksatnamany durmuşa geçirmegiň çäklerinde welaýatlarda we paýtagtymyzda ençeme desgalardyr binalaryň gurluşygyna badalga berler. Şeýle hem birnäçe binalaryň we desgalaryň gurluşygyny tamamlamak göz öňünde tutulýar.

“Biz şu ýyl Aşgabat şäheriniň “Parahat — 7” ýaşaýyş toplumynda 30 sany ýaşaýyş jaýyny hem-de köp sanly söwda we hyzmatlar öýlerini, Büzmeýin etrabyndaky ýaşaýyş jaý toplumynda 46 sany häzirki zaman ýaşaýyş jaýyny, paýtagtymyzda 127 sany iki gatly kottej görnüşli ýaşaýyş jaýyny, 4 müň orunlyk köpugurly medeni merkezi gurup ulanmaga tabşyrarys. Şeýle-de Aşgabatda Halkara pediatriýa, Halkara onkologiýa ylmy-kliniki merkezlerini we Stomatologiýa merkezini ulanmaga bereris. “Arçman” şypahanasynda bolsa 400 orunlyk täze binalar toplumy raýatlara hyzmat edip başlar” diýip, döwlet Baştutanymyz aýtdy.

Şu ýyl Aşgabat — Türkmenabat ýokary tizlikli awtomobil ýolunyň Mary — Türkmenabat bölegi, Balkan welaýatynyň Gyzylarbat etrabynda täze, döwrebap oba, Gyzylarbat etrabynda köpugurly elektrik stansiýasy, Türkmenbaşy etrabynyň Guwlymaýak şäherçesinde ýaşaýyş jaýlar we binalar toplumy ulanmaga berler. Türkmen döwlet binagärlik-gurluşyk institutynyň, Seýitnazar Seýdi adyndaky Türkmen döwlet mugallymçylyk institutynyň täze binalar toplumlary hem dabaraly açylar. Ilatyň ýaşaýyş-durmuş şertlerini gowulandyrmak maksady bilen, awtomobil ýollarynyň, aragatnaşyk, suw, gaz, elektrik üpjünçilik ulgamlarynyň, suw we lagym arassalaýjy desgalaryň gurluşygyna ep-esli serişde goýberiler.

Döwlet Baştutanymyz ýurdumyzda «Garaşsyz, baky Bitarap Türkmenistan — bedew batly at-myradyň mekany» ýyly mynasybetli birnäçe halkara çäreleriň geçiriljekdigini aýtdy we ýylyň dowamynda meýilleşdirilýän çäreleri ýokary derejede geçirmek boýunça guramaçylyk döwlet toparyny döretmek hakynda karara gol çekendigini belledi. Şunda ýylyň dowamynda geçiriljek çärelere gowy taýýarlyk görmegiň we ýokary derejede geçirmegiň möhümdigine üns çekildi.

“Görşüňiz ýaly, şu ýyl üçin kabul eden Maksatnamamyz örän köp işleri öz içine alýar. Ata Watanymyzy mundan beýläk-de has-da gülledip ösdürmek biziň baş maksadymyzdyr” diýip, hormatly Prezidentimiz aýtdy we halkymyz bilen bilelikde tutanýerli zähmet çekip, 2026-njy ýylda bellenen sepgitlere, maksatlara ýetiljekdigine berk ynam bildirdi.

Hormatly Prezidentimiz Serdar Berdimuhamedow Ministrler Kabinetiniň giňişleýin mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan jogapkärli işlerinde uly üstünlikleri arzuw etdi.

***

Ministrler Kabinetiniň giňişleýin mejlisinden soňra, hormatly Prezidentimiziň kabul eden çözgüdine laýyklykda, ýurdumyzyň ministrlikleriniň we pudaklaýyn dolandyryş edaralarynyň maddy-enjamlaýyn binýadyny berkitmek maksady bilen, olara döwrebap awtoulaglar sowgat berildi. Munuň özi berkarar Watanymyzda adam hakyndaky aladanyň ileri tutulýandygynyň, raýatlaryň netijeli zähmet çekmegi üçin ähli şertleriň döredilýändiginiň nobatdaky aýdyň güwäsine öwrüldi.

Şu gün Olimpiýa şäherçesiniň Olimpiýa stadionynda ýurdumyzyň “Arkadag” we Saud Arabystany Patyşalygynyň “Al-Nassr” toparlarynyň tälimçileriniň hem-de futbolçylarynyň gatnaşmagynda metbugat maslahaty geçirildi. Onda paýtagtymyzda geçiriljek halkara futbol ýaryşyny giňden beýan etmek üçin Aşgabada gelen dünýäniň dürli ýurtlarynyň köpçülikleýin habar beriş serişdeleriniň wekilleri öňde boljak oýnuň ähmiýeti, onuň taýýarlyk derejesi we aýratynlyklary bilen gyzyklandylar.

“Al-Nassr” toparynyň ýolbaşçylary we türgenleri Olimpiýa şäherçesinde döredilen şertler, Olimpiýa stadionynyň amatlyklary bilen tanyşdylar. Mälim bolşy ýaly, şu günler dünýä jemgyýetçiliginiň nazary AFK-nyň II Çempionlar ligasynyň 1/8 finalynyň çäklerinde geçiriljek futbol duşuşygyna gönükdi. Munuň özi paýtagtymyzda boljak bu oýnuň halkara giňişlikdäki ähmiýetini görkezýär.

Metbugat maslahatynda “Arkadag” toparynyň tälimçisi we oýunçysy ýurdumyzyň hem-de dünýä döwletleriniň köpçülikleýin habar beriş serişdeleriniň wekilleri bilen duşuşyp, žurnalistleriň sowallaryna jogap berdiler.

“Arkadag” we “Al-Nassr” toparlarynyň arasynda geçiriljek duşuşyga dünýäniň 13 ýurdundan köp sanly žurnalistler gatnaşarlar. Bu bolsa oňa dünýä jemgyýetçiliginiň uly gyzyklanma bildirýändigini subut edýär. Bellenilişi ýaly, Gahryman Arkadagymyzyň Olimpiýa stadionyna gelip, duşuşyga görülýän taýýarlyk işleriniň ýagdaýy bilen tanşyp, futbol ýaryşynyň ýokary guramaçylyk derejesinde geçirilmelidigi barada aýdanlary türkmen futbolçylarynyň ruhuny has-da belende göterdi. Şeýle hem toparyň tälimçisi we futbolçysy özboluşly synag hökmünde kabul edilen duşuşygyň türkmen futbolçylarynyň tejribelerini baýlaşdyrmakda, olaryň oýnuň has netijeli usullaryny özleşdirmeklerinde ähmiýetli boljakdygyny aýdyp, türkmen sportunyň abraýyny belende götermek ugrunda ukyp-başarnyklaryny gaýgyrmajakdyklaryna ynandyrdylar.

Soňra bu ýerde guralan metbugat maslahaty “Al-Nassr” toparynyň tälimçisiniň we oýunçysynyň gatnaşmagynda dowam etdi. Köpçülikleýin habar beriş serişdeleriniň wekilleri ilki myhmanlaryň Türkmenistan we onuň paýtagty baradaky pikirlerini diňlediler. Şeýle hem bu gezekki bäsleşigiň nähili geçjekdigi baradaky çaklamalar bilen gyzyklanyldy.

Myhman toparyň wekilleri türkmen topragynda mähirli kabul edilendikleri üçin hormatly Prezidentimize we Gahryman Arkadagymyza hoşallyklaryny beýan etdiler. Şeýle hem olar ak mermerli Aşgabadyň gözelligine, Olimpiýa şäherçesiniň Olimpiýa stadionynda döredilen mümkinçilikleriň derejesine ýokary baha berdiler. Bellenilişi ýaly, 45 müň orunlyk stadionyň meýdançasynda örän çekeleşikli we gyzykly oýun bolar. Her toparyň ýeňşe umyt baglaýandygy äşgär hakykat. Hut şonuň üçin hem futbolçylar meýdançada täsirli oýun görkezmäge çalşarlar. Şeýle hem olar “Arkadag” toparynyň oýunçylarynyň kämillik derejesiniň ýokarydygyny, olaryň aýratyn yhlasly oýnaýandyklaryny nygtadylar. “Al-Nassryň” wekilleri sazlaşykly ösüş ýoluna düşen ýurduň paýtagtynda bolup, dünýäde meşhurlyk gazanan topar bilen bäsleşmegi özleri üçin uly hormat hasaplaýandyklaryny bellediler.

“Arkadag” we “Al-Nassr” toparlarynyň Aşgabatda boljak duşuşygy Aziýa sportunyň taryhyna möhüm sahypany ýazar. Şunuň bilen baglylykda, bu oýnuň taryhy wakalara we ýatda galyjy pursatlara beslenjekdigini aýdyp bolar. Toparlaryň ýeňşe bolan ynamy hem-de yhlasy oýnuň gyzykly boljakdygyna güwä geçýär.

Hormatly dabara gatnaşyjylar!

Sözümiň başynda Siziň hemmäňize mähirli salamlarymy we iň gowy arzuwlarymy beýan edýärin. Azerbaýjan Respublikasynyň hormatly Prezidenti, gadyrly doganym Ilham Aliýewi hem-de Ermenistan Respublikasynyň hormatly Premýer-ministri Nikol Paşinýany adamzadyň doganlygy ugrunda halkara Zaýed baýragynyň gowşurylmagy bilen tüýs ýürekden gutlaýaryn.

Şu günki dabara özara düşünişmek, ynanyşmak, döwletara dialogy berkitmek, parahatçylyk we durnuklylyk ugrunda päsgelçilikleri ýeňip geçmegi başarmak ýörelgeleriniň häzirki döwrüň çylşyrymly meselelerini hem-de wezipelerini çözmekde örän möhüm, täsirli we öňdengörüjilikli çemeleşmeler bolup durýandygyny aýdyň tassyklaýar.

Biz Türkmenistanda Azerbaýjan Respublikasy we Ermenistan Respublikasy bilen gatnaşyklary ösdürmäge uly hormat bilen garaýarys hem-de muňa aýratyn ähmiýet berýäris. Türkmen halky bilen bu ýurtlaryň halklarynyň arasynda köpasyrlyk taryhy, syýasy, ykdysady we medeni-ynsanperwer arabaglanyşyklar bar. Häzirki wagtda döwletara gatnaşyklarymyz deňhukuklylyk, hoşniýetli goňşuçylyk, özara bähbitlilik ýörelgeleri esasynda yzygiderli ösdürilýär we ýurtlarymyzyň ileri tutýan maksatlaryna doly laýyk gelýär.

Azerbaýjanyň Prezidentiniň we Ermenistanyň Premýer-ministriniň paýhasynyň, ýokary jogapkärçiliginiň iki ýurduň rowaçlygyny, abadançylygyny üpjün etmäge, Günorta Kawkazda uzak möhletli durnuklylygy hem-de ylalaşygy saklamaga we berkitmäge uly täsir edýän wajyp şert bolup çykyş edýändigini nygtamak isleýärin. Şeýh Zaýed adyndaky baýragyň berilmeginiň dünýä derejesinde hoşniýetli goňşuçylyk däpleriniň, parahatçylyk filosofiýasynyň, ynanyşmagyň we özara hormata esaslanýan dialogyň ýokary gymmatlyklaryny yzygiderli gorap saklamak üçin ruhlandyryjy itergi boljakdygyna ynanýarys. Türkmenistan bu ugurdaky işlere hemmetaraplaýyn goldaw bermäge, öz hemişelik Bitaraplyk derejesini, mümkinçiliklerini we toplan syýasy tejribelerini ählumumy hem-de sebitleýin parahatçylygy döretmek boýunça gün tertibini amala aşyrmak, halkara hukugyň kadalaryny, Birleşen Milletler Guramasynyň Tertipnamasyny goramak boýunça derwaýys meseleleri çözmek üçin ulanmaga taýýardyr.

Mälim bolşy ýaly, 2025-nji ýyl Türkmenistanyň başlangyjy bilen Birleşen Milletler Guramasy tarapyndan “Halkara parahatçylyk we ynanyşmak ýyly” diýlip yglan edildi. Bu şanly sene ýokarda agzalan düşünjeleriň zerurdygyny we ähmiýetini örän aýdyň subut etdi. Şeýle hem dürli döwletleriň, abraýly köptaraplaýyn guramalaryň gapma-garşylyklary ýeňip geçmek, halkara gatnaşyklary netijeli hyzmatdaşlyga we özara bähbitli çözgütleri tapmaga gönükdirmek ugrunda edýän tagallalaryna dünýä derejesinde berilýän goldawyň barha güýçlenýändigini açyp görkezdi. Şunuň bilen baglylykda, Azerbaýjan bilen Ermenistanyň arasynda parahatçylygy, ylalaşygy gazanmak boýunça möhüm çözgütleriň hut Halkara parahatçylyk we ynanyşmak ýylynda kabul edilmegi uly taryhy ähmiýete eýedir.

Hormatly dabara gatnaşyjylar!

Şeýh bin Zaýed beýik adamdy. Maňa-da ençeme gezek onuň bilen bir supranyň başynda parahatçylyk barada söhbet etmek miýesser edipdi. Şunuň esasynda Azerbaýjanyň Prezidentine we Ermenistanyň Premýer-ministrine adamzadyň doganlygy ugrunda halkara Zaýed baýragynyň gowşurylmagy syýasy-diplomatik, durmuş-ykdysady, medeni-ynsanperwer ugurlarda alnyp barylýan hyzmatdaşlygy has-da ösdürmäge, netijeli özara gatnaşyklara, bilelikdäki giň möçberli ykdysady we infrastruktura taslamalaryna çykmaga täze itergi berer diýip berk ynanýaryn. Türkmenistanyň bu babatda döredijilikli başlangyçlarydyr mümkinçilikleri oňyn garşylaýandygyny hem-de goldajakdygyny mälim etmek isleýärin.

Mümkinçilikden peýdalanyp, Size berk jan saglyk, abadançylyk, jogapkärli döwlet işleriňizde uly üstünlikleri, siziň goňşy ýurtlaryňyzyň halklaryna bolsa mizemez parahatçylyk, bagt we rowaçlyk, tutuş dünýäniň ähli halklaryna abadançylyk, parahatçylyk arzuw edýärin.

(Aşgabat şäheri)

Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda şu ýylyň ýanwar aýynda ýurdumyzda alnyp barlan işleriň jemleri jemlenildi.

Ilki bilen, Mejlisiň Başlygy D.Gulmanowa 2026-njy ýylyň ýanwar aýynda ýerine ýetirilen işler barada maglumat berdi.

Bellenilişi ýaly, häzirki wagtda Mejlisde ministrliklerden we pudaklaýyn dolandyryş edaralaryndan gelip gowuşýan teklipleriň esasynda adam hukuklarynyň hem-de azatlyklarynyň goraglylygyny üpjün etmek, migrasiýa, daşky gurşawy goramak bilen bagly hereket edýän birnäçe kanunçylyk namalaryna Türkmenistanyň Konstitusiýasynyň, halkara hukugyň umumy ykrar edilen kadalaryna laýyklykda döwrebap üýtgetmeleri we goşmaçalary girizmek boýunça işler alnyp barylýar.

Mejlisde Çad Respublikasynyň Türkmenistandaky Adatdan daşary we Doly ygtyýarly ilçisinden ynanç haty kabul edildi. Dünýä döwletleriniň parlamentleriniň, halkara guramalaryň, ýurdumyzdaky daşary ýurt wekilhanalarynyň wekilleri bilen ikitaraplaýyn hyzmatdaşlyk meselelerini ara alyp maslahatlaşmak boýunça duşuşyklaryň 4-si geçirildi. Mejlisiň deputatlary we hünärmenleri kanun çykaryjylyk işini kämilleşdirmek babatda ýurdumyzyň degişli ministrlikleriniň, pudaklaýyn dolandyryş edaralarynyň halkara guramalar bilen bilelikde guran okuw maslahatlarynyň 6-syna gatnaşdylar.

Hormatly Prezidentimiz döwletimiziň hukuk binýadyny berkitmek, kanunçylygy döwrüň talaplaryna görä kämilleşdirmek boýunça alnyp barylýan işleri dowam etdirmegiň zerurdygyny belledi.

Ministrler Kabinetiniň Başlygynyň orunbasary H.Geldimyradow şu ýylyň ýanwar aýynyň makroykdysady görkezijileri barada hasabat berdi.

Bellenilişi ýaly, hasabat döwründe jemi içerki önümiň ösüşi 6,3 göterim artdy, şol sanda ösüş depgini senagat pudagynda 2 göterime, gurluşykda 6 göterime, ulag-aragatnaşyk pudagynda 9,3 göterime, söwdada 8,2 göterime, oba hojalygynda 2 göterime, hyzmatlar ulgamynda 8,5 göterime deň boldy. Geçen ýylyň degişli döwri bilen deňeşdirilende, şu ýylyň ýanwar aýynda jemi öndürilen önüm 10 göterim ýokarlanyp, ykdysadyýetiň pudaklarynda oňyn önümçilik görkezijileri gazanyldy. Hasabat döwründe bölek satuw haryt dolanyşygy 10,1 göterim artdy. Şu ýylyň ýanwar aýynyň jemleri boýunça Döwlet býujetiniň girdeji böleginiň meýilnamasy 102,2 göterim, çykdajy böleginiň meýilnamasy 97,1 göterim ýerine ýetirildi.

Hasabat döwründe býujetden maliýeleşdirilýän we hojalyk hasaplaşygyndaky döwlet kärhanalarynda zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 21,3 göterim ýokarlandy. Şeýle hem Oba milli maksatnamasyny durmuşa geçirmegiň çäklerinde ýerine ýetirilen işler, şol sanda dürli maksatly desgalaryň gurluşygy barada aýdyldy.

Hormatly Prezidentimiz hasabaty diňläp, ykdysadyýet, maliýe we bank toplumynyň işini kämilleşdirmegi dowam etdirmegiň möhümdigini aýtdy. Şunuň bilen baglylykda, döwlet Baştutanymyz wise-premýere ýurdumyzy ösdürmek boýunça 2026-njy ýylda bellenen wezipeleri üstünlikli durmuşa geçirmegi, jemi içerki önümiň ösüş depginini durnukly saklamak, pudaklary ösdürmek boýunça alnyp barylýan işleri ilerletmegi tabşyrdy.

Ministrler Kabinetiniň Başlygynyň orunbasary B.Amanow ýurdumyzda nebitiň we gazyň çykarylyşyny artdyrmak, olary dünýä bazaryna çykarmagyň ugurlaryny giňeltmek boýunça şu ýylyň ýanwar aýynda ýerine ýetirilen işleriň netijeleri barada hasabat berdi.

Nygtalyşy ýaly, “Türkmennebit” döwlet konserni tarapyndan nebiti çykarmagyň meýilnamasy 107,5 göterim ýerine ýetirildi. Hasabat döwründe nebiti gaýtadan işleýän zawodlar tarapyndan nebiti gaýtadan işlemegiň meýilnamasy 106,4 göterim ýerine ýetirildi. Benzin öndürmegiň meýilnamasy 126,5 göterim, dizel ýangyjyny öndürmegiň meýilnamasy 104,6 göterim, polipropilen öndürmegiň meýilnamasy 100 göterim, çalgy ýaglaryny öndürmegiň meýilnamasy 100 göterim, suwuklandyrylan gazy öndürmegiň meýilnamasy 122,1 göterim, tebigy we ugurdaş gazy çykarmagyň meýilnamasy bolsa 108,3 göterim ýerine ýetirildi.

Hormatly Prezidentimiz hasabaty diňläp, ýurdumyzyň nebitgaz senagatyny ösdürmegiň maksatnamasynda göz öňünde tutulan işleri amala aşyrmak üçin zerur çäreleri görmegiň möhümdigini aýtdy. Döwlet Baştutanymyz wise-premýere tebigy gazyň we nebitiň çykarylyşyny artdyrmak, uglewodorod serişdeleriniň ýataklaryny özleşdirmek boýunça toplumlaýyn çäreleri görmegi, toplumyň kärhanalarynyň önümçilik kuwwatyny yzygiderli artdyrmagy tabşyrdy.

Ministrler Kabinetiniň Başlygynyň orunbasary T.Atahallyýew şu ýylyň ýanwar aýynda ýerine ýetirilen işleriň netijeleri, ýurdumyzyň welaýatlarynda oba hojalyk işleriniň geçirilişi barada hasabat berdi.

Hasabatda bellenilişi ýaly, oba hojalyk pudagy boýunça önümçiligiň ösüş depgini, geçen ýylyň degişli döwri bilen deňeşdirilende, 109,3 göterime deň boldy. Bu görkeziji Oba hojalyk ministrligi boýunça 103,9 göterime, Daşky gurşawy goramak ministrligi boýunça 116,4 göterime, Suw hojalygy baradaky döwlet komiteti boýunça 108,4 göterime, “Türkmenpagta” döwlet konserni boýunça 117,3 göterime, “Türkmengallaönümleri” döwlet birleşigi boýunça 100 göterime, “Türkmenobahyzmat” döwlet birleşigi boýunça 102,9 göterime, Azyk senagaty döwlet birleşigi boýunça 108,2 göterime, Maldarçylyk we guşçulyk senagaty döwlet birleşigi boýunça 100,6 göterime, “Türkmen atlary” döwlet birleşigi boýunça 101,2 göterime deň boldy. Maýa goýum serişdelerini özleşdirmegiň meýilnamasy 107,9 göterim ýerine ýetirildi.

Häzirki wagtda möwsümleýin oba hojalyk işleri dowam edýär. Welaýatlaryň bugdaý ekilen meýdanlarynda ideg etmek, gowaçanyň we beýleki oba hojalyk ekinleriniň ekiljek meýdanlaryny, olaryň tohumlaryny ekiş möwsümine taýýarlamak boýunça degişli işler geçirilýär. Sebitlerde ýerleşýän suw howdanlaryna suw toplamak, suwaryş, şor suw akabalaryny arassalamak hem-de suw hojalyk desgalaryny abatlamak boýunça degişli işler alnyp barylýar.

Hormatly Prezidentimiz hasabaty diňläp, wise-premýere oba hojalyk pudagyny toplumlaýyn ösdürmegi, onuň maddy-enjamlaýyn binýadyny pugtalandyrmagy dowam etdirmegi hem-de möwsümleýin oba hojalyk işleriniň agrotehniki talaplara görä, bellenen möhletlerde geçirilişine berk gözegçilik etmegi tabşyrdy.

Ministrler Kabinetiniň Başlygynyň orunbasary B.Annamämmedow gurluşyk we senagat toplumy tarapyndan 2026-njy ýylyň ýanwar aýynda ýerine ýetirilen işleriň netijeleri barada hasabat berdi.

Hasabat döwründe toplum tarapyndan öndürilen önümleriň we ýerine ýetirilen işleriň meýilnamasy 133,9 göterim berjaý edildi. Gurluşyk we binagärlik ministrligi boýunça öndürilen önümleriň we ýerine ýetirilen işleriň meýilnamasy 105,6 göterim, Senagat we gurluşyk önümçiligi ministrligi boýunça 119,1 göterim, Energetika ministrligi boýunça 114,9 göterim ýerine ýetirildi. “Türkmenhimiýa” döwlet konserni boýunça bu görkeziji 170,8 göterime deň boldy. Awtomobil ýollarynyň gurluşygyny dolandyrmak baradaky döwlet agentligi tarapyndan degişli meýilnama 106,2 göterim berjaý edildi. Aşgabat şäheriniň häkimligi boýunça ýerine ýetirilen işleriň meýilnamasy 112,9 göterime deň boldy.

Hormatly Prezidentimiz hasabaty diňläp, gurluşyk pudagynda göz öňünde tutulan işleriň ýerine ýetirilişine berk gözegçilik etmegiň, ýurdumyzdaky himiýa kärhanalarynyň işini döwrebap guramak boýunça alnyp barylýan işleri dowam etdirmegiň, elektroenergetika pudagynyň kuwwatyny artdyrmagy hemişe üns merkezinde saklamagyň zerurdygyny nygtady. Şeýle hem döwlet Baştutanymyz wise-premýere ýollaryň gurluşygyna we saklanyşyna gözegçiligi güýçlendirmegi, binalardyr desgalary ýokary hilli gurup, bellenen möhletde ulanmaga bermek üçin alnyp barylýan işleri gözegçilikde saklamagy tabşyrdy.

Ministrler Kabinetiniň Başlygynyň orunbasary N.Atagulyýew gözegçilik edýän ministrliklerinde we pudaklaýyn dolandyryş edaralarynda, telekeçilik ulgamynda şu ýylyň ýanwar aýynda alnyp barlan işleriň netijeleri barada hasabat berdi.

Nygtalyşy ýaly, Söwda we daşary ykdysady aragatnaşyklar ministrligi boýunça, geçen ýylyň degişli döwri bilen deňeşdirilende, söwda dolanyşygynyň ösüş depgini 111,4 göterime, öndürilen önümleriň ösüş depgini 100,1 göterime barabar boldy. Dokma senagaty ministrligi boýunça önüm öndürmekde, geçen ýylyň degişli döwrüne görä, 100,8 göterim, şol sanda nah ýüplügiň önümçiliginde 100 göterim, nah matalaryň önümçiliginde 102,4 göterim, gön önümleri babatda 115,3 göterim ösüş gazanyldy. “Türkmenhaly” döwlet birleşigi boýunça önüm öndürmegiň meýilnamasy 104,1 göterim ýerine ýetirildi.

Döwlet haryt-çig mal biržasy tarapyndan hasabat döwründe 26 birža söwdasy geçirilip, olarda 2 müň 361 şertnama hasaba alyndy. 2026-njy ýylyň ýanwar aýynda Söwda-senagat edarasy boýunça ýerine ýetirilen işleriň ösüş depgini 116,3 göterime barabar boldy. Hasabat döwründe 4 maslahat geçirildi. Senagatçylar we telekeçiler birleşmesi boýunça oba hojalyk we azyk önümlerini öndürmegiň ösüş depgini 106,5 göterime, senagat önümlerini öndürmegiň ösüş depgini 105,1 göterime deň boldy.

Hormatly Prezidentimiz hasabaty diňläp, ýurdumyzyň söwda, dokma we telekeçilik pudaklarynyň işini ösdürmegi dowam etdirmegiň möhümdigine ünsi çekdi. Şunuň bilen baglylykda, döwlet Baştutanymyz wise-premýere ýurdumyzyň bazarlaryny hem-de söwda nokatlaryny azyk we beýleki zerur harytlar bilen üpjün etmek, Döwlet haryt-çig mal biržasynyň işini yzygiderli kämilleşdirmek boýunça işleri işjeňleşdirmegi tabşyrdy.

Ministrler Kabinetiniň Başlygynyň orunbasary B.Seýidowa gözegçilik edýän ulgamynda 2026-njy ýylyň ýanwar aýynda alnyp barlan işleriň netijeleri barada hasabat berdi.

Bellenilişi ýaly, hasabat döwründe 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” ýyly diýlip yglan edilmegi, ýurdumyzyň Garaşsyzlygynyň 35 ýyllygy, milli senenamamyzda göz öňünde tutulan baýramçylyklar we belli seneler mynasybetli dürli medeni çärelerdir dabaralar geçirildi. Paýtagtymyzdaky kinoteatrlarda, kinokonsert merkezlerinde kino görkezilişleri hem-de konsertler geçirilip, kitaphanalarda, muzeýlerde, taryhy-medeni ýadygärlikler toplumlarynda medeni hyzmatlar hödürlenildi. Döwletimizde gazanylýan üstünlikler, ösüş-özgerişler baradaky maglumatlar metbugat sahypalarynda, teleradioýaýlymlarda, internet saýtlarynda giňden beýan edildi. Döwlet maksatnamalaryndan, sanly ykdysadyýeti ösdürmegiň degişli Konsepsiýasyndan gelip çykýan wezipeleri ýerine ýetirmek boýunça zerur işler alnyp baryldy. Şeýle hem hasabat döwründe ýurdumyzda birnäçe halkara medeni çäreler geçirildi.

Hormatly Prezidentimiz hasabaty diňläp, medeniýet ulgamynyň işini döwrüň talabyna görä guramagy dowam etdirmegiň möhümdigini belledi. Döwlet Baştutanymyz wise-premýere medeni mirasymyzy öwrenmek hem-de giňden wagyz etmek, taryhy-medeni ýadygärliklerimizi aýawly saklamak üçin zerur çäreleri görmegi tabşyrdy.

Ministrler Kabinetiniň Başlygynyň orunbasary B.Orazdurdyýewa gözegçilik edýän ulgamlarynda şu ýylyň ýanwar aýynda alnyp barlan işleriň netijeleri barada hasabat berdi.

Nygtalyşy ýaly, hasabat döwründe bilim işine okatmagyň öňdebaryjy usullaryny ornaşdyrmaga, ylymly-bilimli nesli terbiýelemäge, mugallymlaryň hünär taýýarlygyny kämilleşdirmäge gönükdirilen özgertmeler dowam etdirildi. Mekdep okuwçylary we talyp ýaşlar halkara ders, internet bäsleşiklerine gatnaşyp, jemi 62 medal gazandylar. Täze ýyl baýramyna bagyşlanan dabaralar, mekdep okuwçylarynyň gyşky dynç alyş möwsümi guramaçylykly geçirildi. Döwletliler köşgünde terbiýelenýän çagalara Gahryman Arkadagymyzyň hem-de hormatly Prezidentimiziň adyndan Täze ýyl sowgatlary dabaraly ýagdaýda gowşuryldy. Hasabat döwründe 2026-njy ýylda ylmyň ugurlary boýunça aspirantura kabul ediljek aspirantlaryň, alymlyk derejelerine dalaşgärleriň, kliniki ordinatorlaryň sany tassyklanyldy.

Ýanwar aýynda “Saglyk” Döwlet maksatnamasyna laýyklykda işler dowam etdirilip, bejeriş-öňüni alyş edaralarynda lukmançylygyň ugurlary boýunça meýilnamalaýyn işler alnyp baryldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna näsag çagalara dürli görnüşli operasiýalar we bejergiler amala aşyryldy. Şunuň bilen bir hatarda, bedenterbiýäni, sporty, Olimpiýa hereketini ösdürmek, türgenleri Olimpiýa oýunlaryna, iri halkara ýaryşlara taýýarlamak boýunça işler dowam etdirildi. “Garaşsyz, baky Bitarap Türkmenistan — bedew batly at-myradyň mekany” ýyly mynasybetli ylmy-amaly maslahatlar, dürli çäreler guraldy.

Arkadagly Gahryman Serdarymyz hasabaty diňläp, ýurdumyzyň ylym, bilim, saglygy goraýyş, sport ulgamlarynyň işini kämilleşdirmegi dowam etdirmegiň zerurdygyny aýtdy. Şunuň bilen baglylykda, döwlet Baştutanymyz wise-premýere bilim edaralarynda ýaşlara döwrebap ylym-bilim bermek işine aýratyn üns bermegi, saglygy goraýyş ulgamyny ösdürmekde halkara tejribeden ugur almagy, sporty ösdürmek, ussat türgenleri taýýarlamak boýunça alnyp barylýan işleri dowam etdirmegi tabşyrdy.

Ministrler Kabinetiniň Başlygynyň orunbasary, daşary işler ministri R.Meredow Daşary işler ministrligi tarapyndan şu ýylyň ýanwar aýynda ýerine ýetirilen işleriň netijeleri barada hasabat berdi.

Bellenilişi ýaly, Türkmenistanyň halkara hyzmatdaşlygynyň ösüşinde ýokary derejedäki saparlar we duşuşyklar möhüm orny eýeleýär. Häzirki wagtda ýurdumyzyň diplomatik gullugy tarapyndan dürli döwletleriň daşary syýasat edaralary bilen bilelikde 2026-njy ýylyň dowamynda hormatly Prezidentimiziň we Gahryman Arkadagymyzyň daşary ýurtlara saparlaryny guramak boýunça degişli işler geçirilýär.

Abraýly halkara guramalar bilen alnyp barylýan hyzmatdaşlygy ösdürmek ýurdumyzyň daşary syýasat strategiýasynyň möhüm ugurlarynyň biri bolup durýar. Şunuň bilen baglylykda, ýanwar aýynda BMG-niň Azyk we oba hojalyk guramasynyň Baş direktorynyň Türkmenistanda saparda bolandygy bellenildi. Hasabat döwründe Daşary işler ministrliginiň üsti bilen jemi 30 wekiliýet döwletimize sapar bilen geldi, Türkmenistandan 65 wekiliýet daşary ýurtlara ugradyldy. Ýanwar aýynda sanly ulgam arkaly dürli derejedäki duşuşyklaryň 21-si geçirildi, Türkmenistanda daşary ýurt döwletleri we halkara guramalar bilen bilelikde resmi gepleşiklerdir duşuşyklaryň 116-sy guraldy. Hasabat döwründe döwletimiziň halkara gatnaşyklarynyň şertnama-hukuk binýadynyň üsti halkara resminamalaryň 12-si bilen ýetirildi.

Ýurdumyzyň Daşary işler ministrligi bilen beýleki döwletleriň daşary syýasat edaralarynyň arasynda syýasy geňeşmeleri geçirmek boýunça degişli işler amala aşyrylýar. Şunuň bilen baglylykda, Türkmenistanyň we Awstriýa Respublikasynyň daşary işler ministrleriniň derejesinde sanly ulgam arkaly syýasy geňeşmeleriň geçirilendigi, Aşgabatda Hindistan Respublikasynyň, Marokko Patyşalygynyň we Russiýa Federasiýasynyň daşary syýasat edaralary bilen geňeşmeleriň guralandygy bellenildi. Ilçihanalaryň üsti bilen diplomatik gatnaşyklary ösdürmek we kämilleşdirmek Türkmenistanyň daşary syýasy işiniň wajyp ugurlarynyň biridir. Bu babatda ýanwar aýynda Çad Respublikasynyň Türkmenistanda täze bellenilen Adatdan daşary we Doly ygtyýarly ilçisiniň ynanç hatyny gowşurandygy aýdyldy.

Hormatly Prezidentimiz hasabaty diňläp, wise-premýer, daşary işler ministrine dünýä döwletleri, abraýly halkara guramalar bilen gatnaşyklary ösdürmek boýunça alnyp barylýan işleri dowam etdirmegi, ýurdumyzda halkara çäreleri ýokary derejede guramaga hem-de geçirmäge möhüm ähmiýet bermegi tabşyrdy.

Ministrler Kabinetiniň Başlygynyň orunbasary M.Çakyýew gözegçilik edýän düzümlerinde 2026-njy ýylyň ýanwar aýynda ýerine ýetirilen işleriň netijeleri barada hasabat berdi.

Bellenilişi ýaly, hasabat döwründe ulag-kommunikasiýa toplumy boýunça ýerine ýetirilen işleriň we hyzmatlaryň ösüş depgini 113,3 göterime deň boldy. Awtomobil, demir ýol, howa, deňiz we derýa ulaglary arkaly ýük daşamagyň ösüş depgini 101,4 göterime, ýolagçy gatnatmagyň ösüş depgini bolsa 103,4 göterime barabar boldy. Hasabat döwründe Demir ýol ulaglary ministrligi boýunça ýerine ýetirilen hyzmatlaryň ösüş depgini 106,7 göterime, Awtomobil ulaglary ministrligi boýunça hyzmatlaryň ösüş depgini 120,9 göterime, “Türkmenhowaýollary” döwlet gullugy boýunça hyzmatlaryň ösüş depgini 119,8 göterime, Deňiz we derýa ulaglary döwlet gullugy boýunça bu görkeziji 102,6 göterime, Aragatnaşyk ministrligi boýunça bolsa 113 göterime barabar boldy.

Hormatly Prezidentimiz hasabaty diňläp, milli ulag ulgamynyň maddy-enjamlaýyn binýadyny yzygiderli berkitmegi we döwrebaplaşdyrmagy dowam etdirmegiň möhümdigini belledi. Şunuň bilen baglylykda, döwlet Baştutanymyz wise-premýere ýolagçy we ýük dolanyşygyny, üstaşyr hem-de halkara ýük daşamalaryň möçberini artdyrmaga möhüm ähmiýet bermegi, ilata edilýän aragatnaşyk hyzmatlarynyň hilini ýokarlandyrmaga aýratyn üns bermegi tabşyrdy.

Soňra hormatly Prezidentimiz Ministrler Kabinetiniň agzalaryna ýüzlenip, şu ýylyň ýanwar aýynda alnyp barlan işleriň netijeleriniň Garaşsyz, baky Bitarap Watanymyzyň uly üstünliklere eýe bolýandygyna aýdyň şaýatlyk edýändigini belledi. “Ykdysadyýetimiziň pudaklarynda özgertmeler üstünlikli dowam edýär, önümçilik pudaklary yzygiderli döwrebaplaşdyrylýar, täze, döwrebap kärhanalary gurmaga we bar bolan kärhanalary döwrebaplaşdyrmaga uly möçberde maýa goýumlar gönükdirilýär” diýip, döwlet Baştutanymyz aýtdy.

Hormatly Prezidentimiz hasabat döwründe jemi içerki önümiň ösüş depgininiň 6,3 göterime deň bolandygyny kanagatlanma bilen belledi. Nebitgaz, söwda, ulag-aragatnaşyk toplumlarynda, oba hojalyk pudagynda netijeli işler durmuşa geçirilýär. Ylym, bilim, saglygy goraýyş we sport, medeniýet ulgamlarynda özgertmeler üstünlikli dowam etdirilýär. Şeýle-de häzirki wagtda täze senagat desgalarynyň, ýaşaýyş jaýlarynyň, dynç alyş we saglyk merkezleriniň, mekdepleriň, çagalar baglarynyň, beýleki desgalaryň gurluşygy üstünlikli alnyp barylýar.

Arkadagly Gahryman Serdarymyz sözüni dowam edip, ýurdumyzy mundan beýläk-de ösdürmek boýunça ýerine ýetirilmeli işleriň, amala aşyrylmaly çäreleriň we öňde durýan wezipeleriň köpdügine ünsi çekdi. Şunuň bilen baglylykda, döwlet Baştutanymyz indiki hepdede Ministrler Kabinetiniň giňişleýin mejlisiniň geçiriljekdigini, onda 2025-nji ýylda alnyp barlan işleriň jemleriniň jemleniljekdigini, kabul edilen maksatnamalaryň we berlen tabşyryklaryň ýerine ýetirilişiniň seljeriljekdigini, käbir beýleki meseleleriň ara alnyp maslahatlaşyljakdygyny belledi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherindäki Aba Annaýew adyndaky Halkara atçylyk akademiýasynda we Görogly adyndaky döwlet atçylyk sirkinde bolup, “At — myrat” okuw merkeziniň çagalary, “Galkynyş” milli at üstündäki oýunlar toparynyň agzalary bilen duşuşdy. Gahryman Arkadagymyz çagalaryň hem-de ýaşlaryň öňünde “Garaşsyz, baky Bitarap Türkmenistan — bedew batly at-myradyň mekany” ýylynyň başynda türkmen bedewleriniň şöhratynyň belende galýandygyny, milli sirk sungatynyň dünýä derejesine çykýandygyny alamatlandyran waka mynasybetli çykyş etdi.

Ahalteke bedewlerini ösdürip ýetişdirmek, olary at çapyşyklaryna taýýarlamak üçin amatly şertleri, ýakymly howa gurşawyny özünde jemleýän künjekde, Gahryman Arkadagymyzyň tagallasyndan binýat bolan Arkadag şäherinde Aba Annaýew adyndaky Halkara atçylyk akademiýasy, Görogly adyndaky döwlet atçylyk sirki, Atçylyk ylmy-önümçilik merkezi, “At — myrat” okuw merkezi hereket edýär. Bu bolsa ahalteke bedewleriniň asyl mekanynda “Garaşsyz, baky Bitarap Türkmenistan — bedew batly at-myradyň mekany” ýylynda-da milli atşynaslyk ýörelgeleriniň ösdürilmegine giň ýol açýar.

Ir bilen Aba Annaýew adyndaky Halkara atçylyk akademiýasynyň ýapyk manežine gelende, Milli Liderimizi akademiýanyň rektory P.Baýramdurdyýew we Halkara ahalteke atçylyk assosiasiýasynyň hem-de Halkara “Türkmen alabaý itleri” assosiasiýasynyň wise-prezidenti B.Rejepow mähirli garşyladylar.

Ýapyk manežde “At — myrat” okuw merkeziniň çagalary Gahryman Arkadagymyzy şatlyk-şowhun bilen mübäreklediler. Merkeziň ýolbaşçysy öz aralaryna gelip, bu ýerde alnyp barylýan işler bilen gyzyklanýandygy we ýaşlara milli atşynaslyk däplerini ylmy esasda öwretmek ugrunda döredilýän şertler üçin Gahryman Arkadagymyza hem-de hormatly Prezidentimize hoşallyk bildirdi. Häzirki döwürde hormatly Arkadagymyzyň başlangyjy esasynda döredilen Aba Annaýew adyndaky Halkara atçylyk akademiýasynyň garamagynda bolan, milli atşynaslaryň täze nesliniň kemala gelmeginde möhüm orun eýeleýän “At — myrat” okuw merkezi atşynaslyk bilen gyzyklanýan ýaşlary özünde jemleýär. Atçylyga höwes edýän çagalar çapyksuwarlyk, milli at üstündäki oýunlar, atly sporty özleşdirmek ýaly ugurlar boýunça tälim alýarlar.

Halk Maslahatynyň Başlygy bu ýerde bilim alýan çagalaryň okuwlary, olaryň milli atşynaslyk däplerini çuňňur özleşdirmekleri babatda alnyp barylýan işler bilen gyzyklandy.

Merkeziň ýolbaşçysy milli we dünýä atçylyk sungatynyň usullaryny, iňlis, rus dillerini, matematika, himiýa derslerini özleşdirmek, çagalaryň kompýuter sowatlylygyny ýokarlandyrmak boýunça toplumlaýyn esasda geçilýän okuwlar barada giňişleýin maglumat berdi. Bellenilişi ýaly, merkezde okuwlar möwsümleýin esasda alnyp barlyp, her möwsümde okamaga isleg bildirýän çagalaryň sany 40-dan geçýär.

“At — myrat” okuw merkeziniň ýaş mugallymlarynyň biri Arkadag şäherinde çagalara degişli ugurlar boýunça bilim-terbiýe bermek bilen bir hatarda, milli atçylyk ugry boýunça ylmy iş bilen meşgullanmak üçin hem ägirt uly mümkinçilikleriň döredilendigini aýdyp, Gahryman Arkadagymyza hem-de hormatly Prezidentimize merkeziň mugallymlarynyň adyndan hoşallygyny bildirdi.

Milli Liderimiz “Garaşsyz, baky Bitarap Türkmenistan — bedew batly at-myradyň mekany” ýylynda merkezde bilim alýan çagalar bilen duşuşmak üçin ýörite gelendigini aýtdy.

Gahryman Arkadagymyz häzirki döwürde ýurdumyzda ýaşlarda ahalteke bedewlerine söýgini döretmek ugrunda ägirt uly işleriň alnyp barylýandygyny, ýaşlarymyzyň döwrebap bilim almaklary, okuwdan boş wagtlaryny netijeli peýdalanmaklary üçin zerur şertleriň döredilýändigini nygtady. Bellenilişi ýaly, bedewe atlanan ýaşlarda mertlik, batyrlyk ýaly häsiýetler kemala gelýär. Aba Annaýew adyndaky Halkara atçylyk akademiýasynyň «At — myrat» okuw merkezi hem ýaşlara dürli ugurlar boýunça bilim bermekde netijeli işleri alyp barýar.

Milli Liderimiz bu ýerde çagalaryň atçylyga degişli hünärleri saýlap almaklary üçin hemme mümkinçilikleriň döredilendigini aýdyp, olarda bedewlere söýgini artdyrmak maksady bilen, okuw merkezine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan 1 million 500 müň manat möçberinde pul sowgadynyň berilýändigini aýtdy. Gahryman Arkadagymyz ata höwesli ýaşlara niýetlenen sowgady gowşurdy we “Sylaglaryňyz gutly bolsun, nesip etsin!” diýip, olara hoşniýetli arzuwlaryny beýan etdi.

«At — myrat» okuw merkeziniň ýolbaşçysy we bu ýerde bilim alýan ýaşlar bildirilen hormat-sylag üçin Gahryman Arkadagymyza hem-de Arkadagly Gahryman Serdarymyza tüýs ýürekden çykýan hoşallyklaryny beýan etdiler. Şeýle hem olar döredilýän mümkinçiliklerden netijeli peýdalanyp, ussat atşynaslar, ökde çapyksuwarlar bolup ýetişmek ugrunda ähli tagallalaryny gaýgyrmajakdyklaryna ynandyrdylar. Haýyr-sahawat gaznasynyň gönükdiren bu serişdeleri okuw merkeziniň maddy-enjamlaýyn binýadynyň has-da berkidilmegine, ýaşlaryň sanly ulgamy işjeň özleşdirmeklerine ýardam berer.

Soňra Gahryman Arkadagymyz merkeziň ýolbaşçylarynyň we okuwçylaryň haýyşy boýunça olar bilen iki sany bedewiň ýanynda ýadygärlik surata düşdi. Munuň özi ykbalyny atçylyga baglamak isleýän ýaşlaryň saýlap alan hünärine höwesiniň, ýurdumyzda ahalteke bedewlerine aýratyn gadyr goýulýandygynyň nobatdaky beýanyna öwrüldi.

Türkmenistanyň Halk Maslahatynyň Başlygy merkezde bilim alýan ýaşlara milli atşynaslyk däplerini içgin özleşdirmekde we ony has-da ösdürmekde uly üstünlikleri arzuw edip, bu ýerden Arkadag şäheriniň Görogly adyndaky döwlet atçylyk sirkine tarap ugrady.

Dünýä medeniýetiniň ösüşine ägirt uly goşant goşan paýhasly pederlerimiziň yhlasyndan dörän ahalteke bedewleri halkymyzyň milli buýsanjyna öwrüldi. Häzirki döwürde ýurdumyzda atçylyk sungatyny ylmy esasda ösdürmäge gönükdirilen ägirt uly işler amala aşyrylýar.

Görogly adyndaky döwlet atçylyk sirkine gelende, Gahryman Arkadagymyz “Galkynyş” milli at üstündäki oýunlar toparynyň agzalary tarapyndan mähirli garşylanyldy.

Milli Liderimiz toparyň agzalary bilen mähirli salamlaşyp, olary «Garaşsyz, baky Bitarap Türkmenistan — bedew batly at-myradyň mekany» ýylynyň ilkinji günlerinde gelip gowşan hoş habar bilen tüýs ýürekden gutlady. Mälim bolşy ýaly, Monte-Karlo şäherinde geçirilen halkara sirk festiwalynda «Galkynyş» milli at üstündäki oýunlar toparyna sirk sungatyna goşan uly goşandy üçin halkara şahadatnamalaryň gowşurylmagy bagtyýar halkymyz üçin ýatdan çykmajak wakalaryň biri boldy.

Hormatly Arkadagymyz ir bilen Aba Annaýew adyndaky Halkara atçylyk akademiýasynyň «At — myrat» okuw merkeziniň çagalary bilen duşuşandygyny, olara Howandarlyga mätäç çagalara hemaýat bermek boýunça haýyr-sahawat gaznasynyň adyndan sowgatlary gowşurandygyny belledi. “Hormatly Prezidentimiz ýurdumyzda atçylygy we atçylyk sportuny ösdürmäge uly üns berýär. Atşynaslarymyzyň işlerini döwrebap alyp barmaklary, «Galkynyş» toparynyň üstünlikli çykyş etmegi üçin ähli şertleri döredýär” diýip, türkmen halkynyň Milli Lideri sözüni dowam etdi.

Gahryman Arkadagymyz «Garaşsyz, baky Bitarap Türkmenistan — bedew batly at-myradyň mekany» diýlip yglan edilen 2026-njy ýylyň dowamynda ýurdumyzda hem-de daşary ýurtlarda köp sanly çäreleri geçirmegiň meýilleşdirilendigini, çäreleriň Maksatnamasynyň işlenip taýýarlanylandygyny aýtdy we toparyň agzalarynyň şol halkara çärelere gatnaşyp, ýurdumyzyň tuguny belende galdyrjakdyklaryna ynam bildirdi.

“Ata-babalarymyzyň «Taý ata ýetirer, at — myrada», «Atym bar — ganatym bar», «At agynan ýerde toý bolar» diýen parasatly pähimleri behişdi bedewlere belent hormatdan nyşandyr. Ahalteke bedewlerimiz ençeme asyrlaryň dowamynda halkymyzyň ýakyn syrdaşy bolmak bilen, bu gün ýurdumyzyň belent ösüşleriniň beýanyna öwrüldi” diýip, Halk Maslahatynyň Başlygy sözüni dowam etdi. Gahryman Arkadagymyz Arkadag şäherinde Aba Annaýew adyndaky Halkara atçylyk akademiýasynyň, «At — myrat» okuw merkeziniň, Atçylyk ylmy-önümçilik merkeziniň, Görogly adyndaky döwlet atçylyk sirkiniň döredilmeginiň ýaşlaryň atçylyk, atşynaslyk sungaty boýunça bilimini kämilleşdirmäge ýardam edýändigini aýdyp, häzirki döwürde ýurdumyzda türkmen bedewiniň şanyna toýlaryň uludan tutulýandygyny, şolaryň esasy bezeginiň bolsa «Galkynyş» milli at üstündäki oýunlar toparydygyny nygtady.

Duşuşykda toparyň agzalarynyň atşynaslyk sungatyny ösdürmek ugrunda uly işleri alyp barýandyklary, olaryň at üstünde görkezýän oýunlarynyň dünýä halklaryny haýran galdyrýandygy, toparyň ençeme halkara ýaryşlarda üstünlikli çykyş edip, Baş baýraklara mynasyp bolandygy bellenildi. Milli atçylyk sungatyny ösdürmek babatda mundan beýläk-de uly işler durmuşa geçiriler. “Türkmen milli atçylyk sungatynyň at-abraýyny belende galdyrmakda alyp barýan işleriňiz üçin hormatly Prezidentimiz sizi gutlap, öz minnetdarlygyny bildirdi. Döwlet Baştutanymyz toparyň maddy-enjamlaýyn binýadyny berkitmek maksady bilen, sizi 3 million manat bilen sylaglamak barada karara geldi” diýip, Gahryman Arkadagymyz degişli çözgüdi mälim etdi.

Milli Liderimiz “Şa serpaýyňyz gutly bolsun! Nesip etsin!” diýip, «Galkynyş» milli at üstündäki oýunlar toparynyň ýolbaşçysyna onuň agzalarynyň mynasyp bolan sylagyny hem-de toparyň agzalarynyň her birine nepislik bilen ýasalan at eýerlerini gowşurdy.

«Galkynyşyň» ýolbaşçysy milli atçylyk sungatyny dünýä ýaýmak we ony ösdürmek ugrunda döredilýän mümkinçilikler, döwlet tarapyndan berilýän goldaw hem-de Şa serpaýy üçin toparyň agzalarynyň we ähli atşynaslaryň adyndan hormatly Prezidentimize hem-de Gahryman Arkadagymyza hoşallyk sözlerini beýan etdi. Şeýle-de ol türkmen atçylyk sungatyny mundan beýläk-de ösdürmek, halkara derejede geçirilýän bäsleşiklere işjeň gatnaşyp, milli atşynaslyk ýörelgeleriniň, ahalteke atlarynyň abraýyny belende galdyrmak ugrunda ähli tagallalaryny gaýgyrmajakdyklaryna ynandyryp, Gahryman Arkadagymyzdan özleri bilen ýadygärlik surata düşmegini haýyş etdi.

Türkmen halkynyň Milli Lideri manežde Garaşsyz atly ajaýyp bedewe atlanyp, olaryň arasyna geldi. Toparyň agzalary Gahryman Arkadagymyzyň daşynda jem bolup, bilelikde ýadygärlik surata düşdüler.

Türkmenistanyň Halk Maslahatynyň Başlygy bedewe atlanyp, manežiň aýlawynda öwrüm etdi. Ynsan gylykly bedew aýaklary bilen gelşikli oýun edip, ynsan bilen bedewiň arabaglanyşygyny äşgär etdi. Milli atşynaslyk däpleriniň özboluşly mekdebini döreden Aba Annaýewiň ajaýyp atlary ösdürip ýetişdirendigini, ömrüni atşynaslyga bagyşlan ussat seýsiň elinden çykan bedewiň ady rowaýata öwrülen Gelşikli atly bedewiň nesil ugrunyň gözbaşynda durýandygyny taryhy maglumatlar tassyklaýar. Hormatly Arkadagymyzyň bedewe atlanan pursatlary hem häzirki bagtyýar zamanamyzda peder-perzent ýolunyň döwrüň ruhuna kybap derejede ösdürilýändigini aýdyň görkezýär.

Soňra Gahryman Arkadagymyz toparyň agzalaryna Garaşsyz atly ajaýyp bedewi sowgat hökmünde gowşurýandygyny aýtdy. “Garaşsyz, baky Bitarap Türkmenistan — bedew batly at-myradyň mekany” ýylynda mukaddes Garaşsyzlygymyza 35 ýyl bolýandygy nazara alnanda, bu sowgat ýurdumyzyň ösüşleriniň özboluşly nyşany bolup durýar.

Milli Liderimiz toparyň düzüminde oglanlar bilen birlikde, gyzlaryň hem çykyş edýändigini, olaryň bilelikdäki yhlasyndan ahalteke bedewleriniň şöhratynyň dünýä dolýandygyny, bu agzybirligiň, ýaşlyk yhlasynyň halkymyz üçin örän buýsançlydygyny nygtady.

Gahryman Arkadagymyz olary gazanan üstünlikleri bilen ýene-de bir gezek tüýs ýürekden gutlap, toparyň her bir ýeňşiniň döwlet derejesinde sarpalanylýandygyna aýratyn ünsi çekdi we olara milli atşynaslyk däplerini ösdürmek ýaly asylly işinde mundan beýläk-de rowaçlyklary arzuw etdi.

Soňra Türkmenistanyň Halk Maslahatynyň Başlygy Gurbanguly Berdimuhamedow Görogly adyndaky döwlet atçylyk sirkinde Aba Annaýew adyndaky Halkara atçylyk akademiýasynyň rektory P.Baýramdurdyýewiň we Halkara ahalteke atçylyk assosiasiýasynyň hem-de Halkara «Türkmen alabaý itleri» assosiasiýasynyň wise-prezidenti B.Rejepowyň gatnaşmagynda iş maslahatyny geçirdi. Onda atçylyk bilen baglanyşykly meseleler ara alnyp maslahatlaşyldy.

P.Baýramdurdyýew häzirki döwürde alnyp barylýan işler, talyplaryň amaly sapaklary tejribede özleşdirmekleri ugrunda döredilen şertler we mugallymlaryň hünär derejesini yzygiderli kämilleşdirmek boýunça döwlet tarapyndan edilýän tagallalar barada maglumat berdi. Bellenilişi ýaly, geljek ýylda Gahryman Arkadagymyzyň başlangyjy esasynda “Galkynyş” milli at üstündäki oýunlar toparynyň döredilmegine 20 ýyl dolýar. Topara Türkmenistanyň medeni mirasyny we sirk sungatyny wagyz etmäge goşan uly goşandy üçin Ýewropa Sirk assosiasiýasynyň hem-de Bütindünýä sirk federasiýasynyň şahadatnamalarynyň gowşurylmagy “Garaşsyz, baky Bitarap Türkmenistan — bedew batly at-myradyň mekany” ýylynyň ilkinji aýynyň wakalarynyň many-mazmun taýdan has-da baýlaşmagyny şertlendirdi.

Mälim bolşy ýaly, bu toparyň agzalary indi 10 ýyldan gowrak wagt bäri halkara bäsleşikleriň ýeňijisi bolup gelýär. Olar 2013-nji ýylda Moskwa şäherinde geçirilen “IDOL” bütindünýä sirk sungatynyň festiwalynda “Altyn Idol” baş baýragyna we diploma hem-de köpçülikleýin habar beriş serişdeleriniň manež şekilindäki ýörite baýragyna, 2014-nji ýylda Italiýa Respublikasynda geçirilen “Latina 2014” halkara sirk festiwalynda baş baýraklara — Altyn kuboga, “Di Albaсete” we “Сonsegina il Premo” baýraklaryna, Italiýanyň Ahalteke atçylyk assosiasiýasynyň ýörite diplomyna, “Сomune di Latina” tapawutlanan baýragyna, 2015-nji ýylda HHR-iň Çžuhaý şäherinde geçirilen sirk sungatynyň II halkara festiwalynyň baş baýragyna — Altyn kubogyna we Guandun welaýatynyň hökümetiniň ýörite güwänamasyna, 2016-njy ýylda Gyrgyz Respublikasynda geçirilen Çarwadarlaryň II bütindünýä oýunlarynda baş baýraga we Gyrgyz Respublikasynyň Medeniýet, habar beriş we syýahatçylyk ministrliginiň Minnetdarlyk diplomyna hem-de medalyna, 2018-nji ýylda Sankt-Peterburg şäherinde geçirilen Fontankadaky I halkara festiwalda baş baýraga — «Altyn Gaetano» altyn kubogyna, 2025-nji ýylda Monte-Karlo şäherinde geçirilen 47-nji halkara sirk sungaty festiwalynda Altyn kuboga we Monakonyň Halkara müdirliginiň ýaş halkara eminleriniň kubogyna, Hindistanyň Rambo sirkiniň ýörite kubogyna, şol ýylyň maý aýynda Stambul şäherinde geçirilen VII etnosport medeniýeti festiwalynda ýörite medallara mynasyp boldy. Gahryman Arkadagymyz bu üstünlikleriň türkmen halky üçin buýsançlydygyny belläp, toparyň işini has-da kämilleşdirmek meselelerine aýratyn ähmiýet berilmelidigine ünsi çekdi.

B.Rejepow häzirki döwürde atçylyk boýunça dünýäniň dürli ýurtlary bilen halkara gatnaşyklaryň ýola goýlandygy we hyzmatdaşlygy mundan beýläk-de ösdürmek ugrunda zerur tagallalaryň edilýändigi barada habar berdi. Şeýle hem ol halkymyzyň döreden milli gymmatlyklaryny dünýäde giňden wagyz etmek ugrunda döwlet tarapyndan tagalla edilýändigi üçin Gahryman Arkadagymyza we Arkadagly Gahryman Serdarymyza hoşallyk bildirdi.

Milli Liderimiz atçylyk ugry boýunça şu ýylyň dowamynda geçiriljek çäreleriň meýilnamasynyň taýýarlanylýandygyna, onda kesgitlenen wezipeleri üstünlikli ýerine ýetirmek babatda ähli zerur tagallalaryň edilmelidigine ünsi çekdi. Şeýle hem Gahryman Arkadagymyz atşynaslyk ýörelgeleriniň, at bilen ykbalyňy baglamagyň, bedewleri ösdürip ýetişdirmegiň özboluşly sungatdygyny, sungatyň bolsa müdimidigini belläp, bu ugurda alnyp barylýan işleriň geljek nesillere ýetirilmegi, onuň dowamata atarylmagy ugrunda zerur işleriň geçirilmelidigini aýtdy.

Şol bir wagtyň özünde “Galkynyş” milli at üstündäki oýunlar toparynyň gazanýan ýeňişleriniň, olaryň dünýä nusgalyk çykyşlarynyň halkara giňişlikde giňden wasp edilmegi babatda degişli düzümleriň sazlaşykly işi ýola goýulmalydyr. Şeýle hem Gahryman Arkadagymyz Arkadag şäherinde atçylygy ösdürmek boýunça alnyp barylýan işleri, atşynaslaryň, seýisleriň we çapyksuwarlaryň kämil neslini döretmek ugrunda edilýän tagallalary beýan edýän çeper filmiň surata düşürilmeginiň maksadalaýyk boljakdygyny nygtap, bu babatda öz maslahatlaryny berdi.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hemmelere alyp barýan asylly işlerinde mundan beýläk-de uly üstünlikleri arzuw etdi we bu ýerden ugrady.