Türkmenistanyň tennisçileri Dewisiň Kubogynyň saýlama tapgyryna ýeňiş bilen başladylar

Şu gün Türkmenistanyň ýygyndy topary Şri-Lankanyň paýtagty Kolombo şäherinde geçirilýän 16 ýaşdan uly bolmadyk ýetginjekleriň arasyndaky Dewisiň Kubogynyň Aziýa we Okeaniýa zolagy boýunça saýlama tapgyrynyň deslapky tapgyryna Omanyň ýygyndysyny 3:0 hasabynda ynamly ýeňmek bilen başlady.

Halkara tennis federasiýasynyň (ITF) Aziýanyň tennis federasiýasy (ATF) bilen bilelikde guramagynda geçirilýän «DCJ Asia/Oceania Pre-Qualifying» ýaryşyna jemi 15 topar gatnaşýar. Gatnaşyjylar 4 toparça bölündiler.

Altynjy belgi bilen ýaryşa gatnaşýan Türkmenistanyň ýygyndysy «B» toparçasynda Singapuryň (2-nji belgi), Mýanmanyň we Omanyň ýygyndy toparlary bilen bäsleşýär.

Beýleki toparçalaryň düzümi: «A» toparça – Şri-Lanka (1-nji belgi), Makao, Saud Arabystany (8-nji belgi); «C» toparça – Malaýziýa (4-nji belgi), Guam, Laos, Filippinler (5-nji belgi); «D» toparça – Wýetnam (3-nji belgi), Nepal, Mongoliýa we Okeaniýanyň ýygyndy topary (7-nji belgi).

Her toparçadan iň gowy netije görkezen iki topar utulan çykdy tapgyryna çykar.

16 ýaşa çenli ýetginjekleriň arasynda geçirilýän Dewisiň Kubogynyň ýaryşynda Türkmenistanyň adyndan halkara meýdançalarynda eýýäm uly üstünliklere eýe bolmagy başaran 14 ýaşly zehinli tennisçilerimiziň üçüsi – Aly Geldiýew, Süleýman Hudaýberdiýew we Kerimgeldi Guldurdyýew çykyş edýärler.

Aşgabat şäherindäki ýöriteleşdirilen 86-njy orta mekdebiň okuwçysy Süleýman Hudaýberdiýew 2024-nji ýylda Katarda, Aşgabatda we Saud Arabystanynda geçirilen 14 ýaşa çenli ýetginjekleriň arasyndaky halkara ýaryşlarda ýekeleýin görnüşinde çykyş edip, üç gezek kümüş medala mynasyp boldy. Geçen ýyl bolsa ol Saud Arabystanynyň Jidda şäherinde geçirilen şeýle bäsleşigiň jübütleýin görnüşinde altyn, ýekeleýin görnüşinde bolsa kümüş medal gazandy. Oňa baýragyny dünýä tennisiniň rowaýaty, 2008-nji ýylyň Olimpiada çempiony (ýekeleýin çykyşlarda), 2016-njy ýylyň Olimpiada çempiony (jübütleýin çykyşlarda), «Uly tuwalga» ýaryşlarynyň 22-siniň, «Masters» tapgyryndaky ýaryşlaryň 36-synyň ýeňijisi, Ispaniýanyň ýygyndysynyň düzüminde bäş gezek Dewisiň Kubogynyň eýesi Rafael Nadal gowşurdy.

Ýaş olimpiýaçylary taýýarlaýan mekdebiň 9-njy synp okuwçysy Aly Geldiýew 2024-nji ýylda Kataryň Doha şäherinde geçirilen 14 ýaşdan uly bolmadyk ýetginjekleriň arasyndaky 3-nji Aziýa ýaryşynda birinjiligi eýeledi. 2025-nji ýylda bolsa Tailandyň Nonthaburi şäherinde geçirilen 14 ýaşa çenli halkara ýaryşynda ýekeleýin we jübütleýin görnüşinde iki sany altyn medala mynasyp boldy. Şol ýaryşda A.S.Puşkin adyndaky umumy bilim berýän bilelikdäki türkmen-rus orta mekdebiniň 9-njy synp okuwçysy Kerimgeldi Guldurdyýew Aly Geldiýew bilen jübütleýin görnüşinde ýeňiji boldy. K.Guldurdyýew mundan ozal «Ashgabat Open 2024» halkara ýaryşynda hem ýeňiş gazanypdy.

Ýetginjekleriň arasyndaky Dewisiň Kubogynda biziň toparymyzyň kapitan wezipesini Aşgabat şäheriniň bedenterbiýe we sport baradaky Baş müdirliginiň 11-nji sport mekdebiniň tälimçisi, 2024-nji ýylyň Türkmenistanyň Kubogynyň bürünç baýrakçysy Gurbanberdi Gurbanberdiýew ýerine ýetirýär. Ol geçen ýyl Türkiýäniň Manawgat şäherinde geçirilen abraýly «ITF Master’s World Team Championship» ýaryşynda «30+» toparynyň düzüminde çärýek finala çenli ýetdi. Şeýle hem ol esasy ýygyndy toparymyzyň tälimçileriniň biri hökmünde Bahreýnde geçirilen Dewisiň Kubogynyň zolak ýaryşynda toparymyzyň Aziýa we Okeaniýa zolagynyň IV toparyna çykmagyna uly goşant goşdy.

16 ýaşa çenli ýetginjekleriň arasyndaky Dewisiň Kubogynyň tapgyryndaky ilkinji duşuşygyň ykbaly eýýäm ýekeleýin çykyşlarda çözüldi. Aly Geldiýew 1 sagat 2 minudyň dowamynda Mutaz Al Mazruini 6:1, 6:2 hasabynda, Süleýman Hudaýberdiýew bolsa 1 sagat 6 minudyň dowamynda Abdulrahman Al Rahbini 6:2, 6:0 hasabynda utdy. Jübütleýin görnüşinde Aly Geldiýew bilen Kerimgeldi Guldurdyýew 54 minudyň içinde Mutaz Al Mazruini we Abdulrahman Al Rahbini 6:3, 6:1 hasabynda ýeňmegi başardylar.

Indiki duşuşykda biziň tennisçilerimiz birinji tapgyrda Singapuryň toparyndan 1:2 hasabynda utulan Mýanmanyň topary bilen oýnarlar.

Beýleki toparçalardaky birinji duşuşyklaryň netijeleri: «A» toparçasy: Şri-Lanka – Makao – 3:0; «C» toparçasy: Malaýziýa – Guam – 3:0, Laos–Filippinler – 1:2; «D» toparçasy: Wýetnam – Nepal – 3:0, Mongoliýa – Okeaniýa – 1:2.

Ýetginjekleriň arasyndaky Dewisiň Kubogy Halkara tennis federasiýa tarapyndan 1985-nji ýylda 16 ýaşdan uly bolmadyk oglanlaryň arasyndaky Dünýä Kubogy hökmünde döredilip, 2002-nji ýylda häzirki adyna eýe boldy. Her ýyl dürli ýurtlar sebitleýin saýlama ýaryşlaryna gatnaşýarlar we şol ýaryşlaryň ýeňijileri final tapgyrynda çempionlyk ugrunda bäsleşýärler.

«AA»-nyň habarçysy